Ulttyq bank valıýta aıyrbastaý naryǵynda alypsatarlyqty shekteıtin qujat qabyldamaqshy
ASTANA. KAZINFORM — Ulttyq bank valıýta aıyrbastaý naryǵynda alypsatarlyqty shekteıtin qaýly jobasyn kópshilik talqylaýyna shyǵardy.
— Jobada ýákiletti bankterdiń klıentterdiń júrgizilgen valıýtalyq operatsııalary boıynsha eseptilikti usyný merzimderin qysqartýǵa baǵyttalǵan túzetýler kózdelgen. Bankterdiń eseptilikti usyný merzimderi naryqtaǵy jaǵdaı týraly málimetterdi ýaqtyly alý, ony taldaý jáne qajet bolǵan jaǵdaıda jedel sharalar qabyldaý maqsatynda qysqartylady, — dep jazylǵan baspasóz-relızde.
Sondaı-aq qujat beırezıdentterdiń konversııalyq operatsııalaryna kúsheıtilgen qarjylyq monıtorıng júrgizýge arnalǵan.
— Bul túzetý shetel valıýtasyna alypsatarlyq suranysty boldyrmaý, sondaı-aq beırezıdentterdiń qatysýymen túrli shemalardy qoldana otyryp, konversııalyq operatsııalardy júrgizý kezinde Qazaqstan Respýblıkasynyń valıýtalyq zańnamasynyń talaptaryn aınalyp ótpeý úshin ázirlendi. Bul rette rezıdentterge taýarlar men qyzmetterdi satýdan, teńgege qarjy aktıvterin satýdan, Qazaqstan aýmaǵyndaǵy qyzmetten dıvıdendter alýdan túsetin teńgege shetel valıýtasyn konvertatsııalaý standartty rejımde júrgiziledi, — delingen qujatta.
Eske salsaq, 2024 jyldyń aıaǵyna qaraı teńge baǵamy qatty qubylyp, keıbir sarapshylar munyń sebebin naryqtaǵy alypsatarlyq árekettermen baılanystyrǵan.