Ulttyq bank tutynýshylyq nesıeni 5 jyldan astam merzimge berýge tyıym salmaq
ASTANA. KAZINFORM – Ulttyq bank tutynýshylyq nesıeni 5 jyldan astam merzimge berýge tyıym salmaq. Bul jaıynda Ulttyq bank tóraǵasy Tımýr Súleımenovtiń qatysýymen ótken brıfıngte belgili boldy.
Іs-shara barysynda Kazinform tilshisi Ulttyq bank tóraǵasynan "nesıe kópirshigine" jol bermeý sharalary týraly suraǵan edi. Saýalǵa jaýap bergen Tımýr Súleımenov tutynýshylyq nesıeni shekteýge baǵyttalǵan birqatar qadamnyń qabyldanǵanyn atap ótti.
– Ótken jyly zańnamalyq deńgeıde, al bıyl qosymsha normatıvtik deńgeıde tutynýshylyq nesıeleýdi shekteýge qatysty birqatar shara qabyldandy. Nátıjesin kórip te otyrmyz. Ótken jyly nesıeleý 39 paıyzǵa ósim kórsetse, bıyl bul kórsetkish 30 paıyzǵa deıin tómendedi. Biraq 30 paıyz degenniń ózi de joǵary, – dedi ol.
Osy oraıda, Ulttyq bank tóraǵasynyń orynbasary Aqyljan Baımaǵambetov bolashaqtaǵy sharalarǵa keńinen toqtaldy. Onyń aıtýynsha, makroprýdentsııalyq retteý ókilettigi retteýshi organǵa berilgen.
– Búgin ǵana Ulttyq bank basqarmasynyń qaýlysy tirkeldi. Oǵan sáıkes makroprýdentsııalyq normatıvterdi Ulttyq banktiń ózi belgileıdi. Qaryz júktemesiniń koeffıtsıenti men basqa da birqatar shara qabyldandy. Bankter qosarlanǵan tabys kórsetkishteri men jalǵan tabystar bolmaýy úshin azamattardyń tabysyn muqııat tekserýge mindetti bolady, – deli ol.
Sondaı-aq ol jańa erejelerde nesıeleý merzimine qatysty shekteýler engiziletigin aıtty.
– Jalpy, uzaq merzimge beriletin tutynýshylyq nesıeler de shekteledi. Qaryz júktemesi koeffıtsıentine sáıkes kelý úshin nesıelerdiń merzimi uzartylyp jatqany jasyryn emes. Biraq keıinnen mundaı nesıeler boıynsha tólemsizdik artyp, olar qaıtarylmaıtyn qaryzǵa aınalýda. Sondyqtan bes jyldan asatyn tutynýshylyq kepilsiz nesıelerdi berý múmkin bolmaıdy. Mundaı shekteý jańa erejelerde qarastyrylǵan. Biz bul jaǵdaıdy muqııat baqylaýda ustap otyrmyz, – dep atap ótti Ulttyq bank tóraǵasynyń orynbasary.
Buǵan deıin Tımýr Súleımenov avtokólikterge suranystyń artýy tutynýshylyq belsendiliktiń ósýin kórsetetinin aıtqan edi.