Ulttyq bank «tsıfrlyq teńge» uǵymyna anyqtama berdi
ASTANA. KAZINFORM — QR Ulttyq banki saýalymyzǵa joldaǵan jaýabynda 18 shildede qoldanysqa enetin tsıfrlyq teńgeniń ne ekenin jáne azamattarǵa qandaı tıimdiligi bar ekenin keńirek túsindirdi.
Banktiń málimetinshe, ol aqshanyń úshinshi túri ispetti.
— Tsıfrlyq teńge — qolma-qol aqshamen de, qolma-qol aqshasyz da qoldanysta qatar júretin aqshanyń úshinshi, tsıfrlyq formasy. Ol qolma-qol aqshanyń da, qolma-qolsyz aqshanyń da qasıetine ıe jáne barlyq paıdalanýshylar úshin túbegeıli jańa múmkindikter ashady. Retteý turǵysynan tsıfrlyq teńge memlekettik emıtent shyǵaratyn jáne osy emıtenttiń birinshi kezekte tólem quraly retinde paıdalaný mindettemesine keletin qolma-qolsyz aqshanyń jańa formasy retinde OBTsV (ortalyq banktiń tsıfrlyq valıýtasy) anyqtamasyna sáıkes keledi, — delingen Ulttyq banktiń resmı saýalymyzǵa joldaǵan jaýabynda.
Sonymen qatar, tsıfrlyq teńge qolma-qol jáne qolma-qolsyz aqshany almastyrý maqsatynda emes, olarǵa qosymsha aqsha túri retinde paıdalanylmaq.
— Tsıfrlyq teńgeniń negizgi artyqshylyqtarynyń biri — baǵdarlamalaný múmkindigi. Bul aqshany «baptaýǵa», ıaǵnı baǵdarlamalaýǵa bolatyndyǵyn bildiredi. Mysaly, ony qashan jáne ne úshin jumsaıtynyńyzdy belgileı alasyz. Osynyń arqasynda esepteý jyldam, yńǵaıly jáne ashyq bolady. Tsıfrlyq teńge engizilgennen keıin Qazaqstandaǵy qolma-qol jáne qolma-qolsyz aqsha onymen teń paıdalanylatyn bolady, — delingen Ulttyq bank jaýabynda.
Aıta keteıik, buǵan deıin 18 shilde tsıfrlyq teńge qoldanysqa enetinin jazǵanbyz.
