Ulttyq bank tsıfrlyq teńge aınalymyn 1 trln teńgege jetkizbek
ASTANA. KAZINFORM – Ulttyq antıfrod-ortalyqtyń jumysy nátıjesinde 68 mlrd teńgeden astam somaǵa alaıaqtyq operatsııalarǵa tosqaýyl qoıyldy. Bul týraly Senattyń jalpy otyrysynda Ulttyq bank tóraǵasy Tımýr Súleımenov aıtty.
- Memleket basshysynyń tapsyrmasy boıynsha biz Ulttyq tsıfrlyq qarjy ınfraqurylymyn tolyqqandy iske qosýdy qamtamasyz ettik. Ol qaýipsiz bıometrııany, bankter arasyndaǵy qolaıly tólemder men aqsha aýdarymdaryn, tsıfrlyq teńgeni, alaıaqtyqtan qorǵaýdy jáne zamanaýı tsıfrlyq servısterdi biriktiredi, - dedi Tımýr Súleımenov Úkimettiń ótken jylǵy respýblıkalyq bıýdjettiń atqarylýy týraly esebin talqylaý barysynda.
Onyń dereginshe, ótken jyly 340 mıllıardqa jýyq tsıfrlyq teńge shyǵaryldy. Bıyl tsıfrlyq teńgeni memlekettik qarjy salasynda paıdalaný aıasy keńeıtiledi.
- Úkimetpen birlesip tıisti Jol kartasy bekitildi. Tsıfrlyq teńgeniń aınalymyn 1 trıllıonǵa deıin jetkizýdi josparlap otyrmyz. Ulttyq bank jumysynyń mańyzdy bóligi – qarjylyq alaıaqtyqqa qarsy is-qımyl júrgizý. Ulttyq antıfrod-ortalyqtyń jumysy nátıjesinde 68 mlrd teńgeden astam somaǵa alaıaqtyq operatsııalarǵa tosqaýyl qoıylyp, 95 myńnan astam azamattardyń qarjylyq múddesi qorǵaldy,- dedi Ulttyq bank basshysy.
Aıta keteıik, 2025 jyly elimizdiń altyn-valıýta rezervteri 42,8 paıyzǵa ósti.
