Ulttyq bank tsıfrlyq aktıv operatorlaryn lıtsenzııalaý tártibin bekitti
ASTANA. KAZINFORM - Qazaqstan Ulttyq bankiniń 2026 jylǵy 29 sáýirdegi qaýlysymen qamtamasyz etilmegen tsıfrlyq aktıvterdi aıyrbastaý operatorlarynyń qyzmetin júzege asyrý qaǵıdalary bekitildi.
Jańa qujatqa sáıkes, lıtsenzııa alýdy josparlaǵan zańdy tulǵalar Ulttyq bankke belgilengen úlgidegi ótinishti tsıfrlyq aktıvter týraly zańnamada kózdelgen barlyq qajetti qujattar men málimetterdi qosa tapsyrýy tıis (12-2-baptyń 6-tarmaǵy).
Eger ótinish tapsyrylǵannan keıin qujattarǵa ózgerister engizilse, operator bul týraly Ulttyq bankti 10 jumys kúni ishinde habardar etip, jańartylǵan nusqalaryn joldaýǵa mindetti.
2026 jylǵy 12 shildeden bastap tsıfrlyq aktıvter naryǵyndaǵy dılerlik qyzmetke, onyń ishinde qamtamasyz etilmegen tsıfrlyq aktıvterdi aıyrbastaý operatsııalaryna lıtsenzııa berý jónindegi memlekettik qyzmet kórsetýdiń jańartylǵan tártibi kúshine enedi.
Jańa reglamentke sáıkes rásim birneshe kezeń boıynsha júzege asyrylady:
– Ulttyq bankke kelip túsken ótinish túsken kúni qabyldanyp, tirkeledi jáne profıldik bólimshege joldanady;
– eGov portaly arqyly ótinish bergen jaǵdaıda, ótinish berýshi jeke kabınetinde ótinishtiń qabyldanǵany týraly málimetti kúni men ýaqyty kórsetilgen túrde birden kóre alady;
– Ulttyq bank kompanııa basshysy men zańdy tulǵanyń tirkelýi týraly qajetti aqparatty memlekettik aqparattyq júıeler arqyly alady.
Ótinish tirkelgennen keıin eki jumys kúni ishinde qujattardyń tolyqtyǵy tekseriledi. Eger qujattar toptamasy tolyq bolmasa, ótinishti qaraýdan bas tartý týraly dáleldi jaýap joldanady.
Qujattar talaptarǵa sáıkes kelgen jaǵdaıda, ótinish belgilengen merzimde qaralyp, lıtsenzııa berý týraly joba nemese dáleldi bas tartý sheshimi daıyndalady.
Lıtsenzııa berýden bas tartýǵa negizder anyqtalǵan jaǵdaıda, ótinish ıesine aldyn ala sheshim jiberiledi. Osydan keıin oǵan tyńdaý rásimi aıasynda óz ustanymyn bildirýge múmkindik beriledi. Tyńdaý ótetini týraly habarlama qaraý merzimi aıaqtalǵanǵa deıin keminde úsh jumys kúni buryn joldanady, al otyrys habarlama berilgennen keıin eki jumys kúninen keshiktirilmeı ótkiziledi.
Buǵan deıin Qazaqstan Ulttyq banki teńgeniń shetel valıýtalaryna qatysty resmı baǵamyn aıqyndaý qaǵıdalaryna ózgerister jobasyn ázirledi.
