Ulttyq bank tóraǵasy teńge baǵamyna qatysty túsinik berdi
ASTANA. KAZINFORM — Qazir ulttyq valıýtanyń qunsyzdanýyna eshbir negiz joq. Bul týraly Májilistiń jalpy otyrysynan keıin Ulttyq bank tóraǵasy Tımýr Súleımenov málim etti.
Onyń aıtýynsha, Ulttyq bank dollar baǵamynyń sharyqtaýyna sebep bolatyn naryqtyq alǵysharttardy kórip turǵan joq.
Sonymen qatar T. Súleımenov teńge baǵamyna dástúrli túrde jaz aılarynda maýsymdyq qysym bolýy múmkin ekenin aıtty. Buǵan eńbek demalysynyń bastalýy jáne halyq pen bıznes tarapynan shetel valıýtasyna suranystyń kúrt artýy yqpal etedi.
— Dollar baǵamyna da dál osyndaı maýsymdyq suranystar áser etedi. Jazda adamdar demalysqa shyǵar kezde shetel valıýtasyn satyp alady. Munymen qosa, iri kompanııalar qurylys maýsymynda jobalardy aıaqtaý úshin sheteldik qural-jabdyqtardy satyp alady. Sondyqtan jazda jáne kúzde dollarǵa suranys únemi joǵary bolady, — dep túsindirdi ol.
Onyń sózine qaraǵanda, bul úrdis bıyl da qaıtalanýy múmkin. Biraq baǵamnyń kúrt ósýine alyp keletin sebep joq.
Buǵan deıin álemdik munaı baǵasynyń kóterilýi teńge baǵamyna aıtarlyqtaı áser etpegenin jazǵan edik.
