Ulttyq bank tóraǵasy bazalyq mólsherlemeni odan ári tómendetýge qatysty pikir bildirdi
ASTANA. KAZINFORM – Ulttyq bank tóraǵasy Tımýr Súleımenov bazalyq mólsherlemeni odan ári tómendetý jospary týraly aıtty.
Aıta keteıik, 5 maýsymda Ulttyq bank segiz aıda alǵash ret bazalyq mólsherlemeni 18%-dan 17%-ǵa deıin tómendetý týraly sheshim qabyldady.
Alaıda Tımýr Súleımenovtiń aıtýynsha, ázirge retteýshi tarap bazalyq mólsherlemeni tómendetýdiń turaqty tsıklin bastaýǵa daıyn emes.
— Tsıkl týraly aıtý áli erte. Jınaqtalǵan oń úrdisterge qaramastan, táýekelder áli de bar. Sondyqtan biz eshqandaı naqty ýáde bergimiz kelmeıdi. Inflıatsııa biz kútken traektorııamen tómendese ǵana, tıisti sheshimder qabyldaýǵa múmkindik týady. Al qazir «tek tómendetý bolady, úzilis bolmaıdy» dep aıtý asyǵystyq bolar edi, — dedi ol Ulttyq banktegi baspasóz máslıhatynda.
Sonymen qatar Ulttyq bank azyq-túlik ınflıatsııasynyń dınamıkasyn, valıýta baǵamynyń turaqtylyǵyn jáne kvazımemlekettik baǵdarlamalardyń júzege asýyn baqylaýdy jalǵastyratynyn atap ótti.
— Eger azyq-túlik ınflıatsııasy tómendese, tarıftik saıasat úkimetpen kelisilgen josparǵa saı júzege assa, valıýta baǵamy turaqty bolsa jáne kvazımemlekettik baǵdarlamalar josparǵa sáıkes oryndalsa, ınflıatsııanyń tómendeý úrdisi jalǵasady. Bul óz kezeginde bazalyq mólsherlemeni ári qaraı tómendetýge múmkindik beredi, — dedi ol.
Súleımenovtiń aıtýynsha, ınflıatsııaǵa tolyq baqylaý ornady deý áli erte.
— Inflıatsııany jeńdik deýge áli bolmaıdy. Qazir ol 10,4% deńgeıinde, ıaǵnı áli de joǵary. Sondyqtan saqtyqty tómendetýge bolmaıdy, — dedi ol.
Eske salaıyq, 5 maýsymda Ulttyq bank bazalyq mólsherlemeni 18%-dan 17%-ǵa túsirdi. Bul sheshim ınflıatsııanyń baıaýlaýyna baılanysty qabyldanǵan.
