Ulttyq bank tólem operatsııalarynda alaıaqtyqqa qarsy jańa kodtar men sharalardy engizedi
ASTANA. KAZINFORM — Qazaqstan Ulttyq banki tólemder men mobıldi aýdarymdarǵa qatysty jańa qaǵıdalardy ázirledi, dep habarlaıdy Kazinform agenttiginiń tilshisi.
Tıisti qaýly jobasy «Ashyq NQA» portalynda jarııalanyp, 5 maýsymǵa deıin qoǵamdyq talqylaýǵa shyǵarylǵan.
Qujatqa sáıkes, tólem taǵaıyndaý kodtarynyń tizbesi keńeıtilip, jańa kodtar engiziledi. Atap aıtqanda, jeke kásipkerler úshin «332» kody qoldanýǵa ruqsat berilmek. Al ulttyq tsıfrlyq valıýtamen júrgiziletin operatsııalar úshin «196», «197», «198» jáne «199» sııaqty jeke kodtar qarastyrylǵan.
Sonymen qatar «113» jáne «114» kodtaryn maqsatty jınaqtar boıynsha tólemderge keńinen qoldaný usynylyp otyr. Bul qarajattyń saqtalýyn qamtamasyz etýge jáne ýákiletti operator men bankter arasyndaǵy aýdarymdar kezinde úshinshi tulǵalardyń óndirip alýynan qorǵaýǵa múmkindik beredi.
Ulttyq bank sondaı-aq bankaralyq tólem kartalary júıesiniń jumys qaǵıdalaryn jańartýdy josparlap otyr. Ózgerister qamtamasyz etý somasyn paıdalaný tártibine, «overdraft» túrindegi qaryz berý sharttaryna, sondaı-aq esep aıyrysý júıesindegi «KASE» klırıng ortalyǵynyń róline qatysty.
Budan bólek, bankter arasynda alaıaqtyqqa qarsy is-qımyl júıesin kúsheıtý maqsatynda bankaralyq mobıldi tólemder júıesine de ózgerister engiziledi. Tólem habarlamalarynda qoldanylatyn derekter tizbesi naqtylanyp, bankter almasatyn aqparat quramyna qosymsha talaptar qoıylmaq.
Ulttyq bank ókilderi bul joba Konstıtýtsııa men Qazaqstannyń Tsıfrlyq kodeksine sáıkestendirý maqsatynda redaktsııalyq túzetýlerdi de qamtıtynyn atap ótti.
Aıta keteıik, buǵan deıin Ulttyq bank qaryz alýshynyń kirisine qatysty borysh koeffıtsıentiniń shekti deńgeıin engizýdi josparlap otyrǵanyn jazǵanbyz.
