Ulttyq bank tólem qyzmetteri qaǵıdalaryna ózgerister engizýdi usyndy

ASTANA. KAZINFORM — Ulttyq bank basqarmasynyń tólemder jáne tólem qyzmetteri máseleleri boıynsha keıbir qaýlylaryna ózgerister men tolyqtyrýlar engizý týraly qaýly jobasy «Ashyq NQA» portalynda 20 aqpanǵa deıin qoǵamdyq talqylaýǵa shyǵaryldy. 

Atalǵan joba «Qazaqstan Respýblıkasyndaǵy bankter jáne bank qyzmeti týraly», sondaı-aq «Qazaqstan Respýblıkasynyń keıbir zańnamalyq aktilerine qarjy naryǵyn retteý jáne damytý, baılanys jáne bankrottyq máseleleri boıynsha ózgerister men tolyqtyrýlar engizý týraly» zańdardy iske asyrý sheńberinde ázirlengen.

— Jobada elektrondyq aqsha ıelerin ońaılatylǵan sáıkestendirýdi alyp tastaý kózdelgen. Sonymen qatar múgedektigi bar adamdardyń múddelerin eskere otyryp, bankterdiń elektrondyq bank qyzmetterin kórsetý barysynda sáıkestendirý derekterimen almasý ortalyǵy arqyly bıometrııalyq aýtentıfıkatsııany qoldaný tártibin bekitý usynylady, — delingen qujatta.

Budan bólek, jobada derbes derekterdi qorǵaý jáne elektrondyq qyzmetterdiń qaýipsizdigin qamtamasyz etýge qoıylatyn talaptardy naqtylaý qarastyrylǵan.

Sonymen qatar Ulttyq banktiń ashyq bankıng júıesi arqyly tólem qyzmetterin bógde jetkizýshilerdiń elektrondyq bank qyzmetterin kórsetý tártibin bekitý ashyq bankıng júıesiniń qatysýshylary men operatory arasyndaǵy ózara is-qımyldyń quqyqtyq aıqyndyǵyn qamtamasyz etýge baǵyttalǵan.

Aıta keteıik, Ulttyq bank bankaralyq mobıldi tólemder júıesiniń qaǵıdalaryn bekitpek.