Ulttyq bank tólem kartalaryna qatysty eskertý jasady

ASTANA. KAZINFORM — Qazaqstan Ulttyq banki «dropperlerdiń» tólem kartalary arqyly jasalatyn alaıaqtyq shemalar kóbeıgeni týraly habarlady.

— Keıingi kezde jastar men zeınetkerlerdi aldap soǵý jıilep ketti. Olardyń keıbiri sanaly túrde, al keıbiri bilmestikten túrli alaıaqtyq shemalarǵa aralasyp ketedi. Naqtyraq aıtqanda, aqshalaı syıaqy alý úshin ózderiniń bank kartalaryn úshinshi tulǵalarǵa berip, urlanǵan qarajatty basqa shotqa aýdarý men qolma-qol aqshaǵa aınaldyrý úshin bank shottaryn ashyp, «dropperlerge» aınalyp otyr.

Teris pıǵyldy adamdar jastardy nemese zeınetkerlerdi izdep, olardy zańsyz qarjy operatsııalaryna tartý úshin áleýmettik jeliler, messendjer men basqa da tsıfrlyq platformalardy belsendi túrde paıdalanady. Alaıaqtar ońaı jáne jyldam tabys túsetinine ýáde berip, bank kartasyn ashýdy jáne onyń aldyńǵy jaǵyndaǵy 16 tańbaly nómirdi, jaramdylyq merzimin, úsh tańbaly CVV/CVC kodyn, sondaı-aq qosymshaǵa kirý derekterin, ıaǵnı kartanyń barlyq rekvızıtin berýdi suraıdy. Qaskóıler derekterdi qolǵa túsirgennen keıin ózderiniń zańsyz qarjy operatsııalaryn júrgizedi, sonyń ishinde alaıaqtyq jolmen ıemdengen aqshany shyǵaryp alady, — delingen Ulttyq bank habarlamasynda.

Qylmystyq kodekske sáıkes dropperlik shemalarǵa aralasqandar endi qylmystyq jaýapkershilikke tartylady.

—  Ulttyq bank azamattarǵa bank kartalaryn jáne olardyń rekvızıtterin, sonyń ishinde mobıldi bankıng qosymshasyna kirýge arnalǵan derekterdi eshkimge bermeýge, saq bolýǵa jáne ońaı tabys tabýǵa ýáde bergenderge senbeýge, kúmán týyndaǵan kezde bank ókilderimen keńesýge, al bank kartasy joǵalǵan jaǵdaıda ony dereý buǵattap, bul týraly bankke habarlaýǵa keńes beredi.

Eger sizge bank kartasyn satyp alý nemese úshinshi tulǵalarǵa berýge qatysty kúmándi usynystar tússe, dereý Qazaqstan Respýblıkasynyń quqyq qorǵaý organdaryna júginýdi usynamyz, — delingen habarlamada.

Aıta ketelik Oralda ınternet-alaıaqtyqqa qatysy bar kúdikti ustaldy.