Ulttyq bank: teńgeniń qunsyzdanýyna irgeli sebepter joq

ASTANA. KAZINFORM — Teńge baǵamynyń qazirgi jaǵdaıyna baılanysty Ulttyq bank tóraǵasynyń orynbasary Álııa Moldabekova túsinikteme berdi. Bul týraly Kapital.kz saıty jazdy. 

Onyń aıtýynsha, teńgeniń álsireýi negizinen naryqtyq faktorlarmen baılanysty, degenmen irgeli (fýndamentaldy) jaǵdaılar áli de qolaıly kúıinde qalyp otyr.

— Qazirgi ýaqytta irgeli faktorlar teńgeniń álsireýin boljaýǵa negiz bermeıdi. Munaı baǵasy salystyrmaly túrde joǵary deńgeıde saqtalyp tur. Álemdik naryqtarda AQSh dollarynyń damyǵan jáne damýshy elderdiń valıýtalaryna qatysty álsireýi baıqalady. Syrtqy kúızelister joq. Osyǵan baılanysty teńgeniń qazirgi baǵamy irgeli turǵydan tómen baǵalanǵan dep esepteledi, — dedi Moldabekova.

Sonymen qatar, bıýdjet shyǵyndary men ımportqa tólemder kólemi artqan. Іri kompanııalardyń sheteldik bırjalarda ornalastyrylǵan depozıtarlyq jazbalar boıynsha dıvıdendter tóleýi de teńge baǵamyna qosymsha qysym kórsetedi, sebebi bul tólemder shetel valıýtasyna aıyrbastaýdy talap etedi. Sondaı-aq, jaz mezgilinde halyqtyń sheteldik saparlarǵa jıi shyǵýyna baılanysty valıýtaǵa degen suranys artady.

— Bul protsesterdiń jıyntyǵy qazirgi ýaqytta teńge baǵamynyń maýsymdyq álsireýine alyp kelip otyr. Ádette, mundaı aýytqýlar qalypty jáne qysqa merzimdi sıpatqa ıe, ári naryqtaǵy suranys pen usynystyń tabıǵı ózgeristerin kórsetedi. Spekýlıatıvtik faktorlarǵa kelsek, qazirgi ýaqytta olardyń naryqqa yqpaly baıqalmaıdy. Qatysýshylar aıyrbastaý baǵamyn ózderi qalyptastyrady, al naryqta qysqa merzimdi faktorlar basym bolyp otyr, — dep atap ótti Ulttyq bank tóraǵasynyń orynbasary.

Sonymen qatar, Ulttyq bank qajet bolǵan jaǵdaıda aldyn ala sharalar qabyldaýǵa daıyn ekenin málimdedi.

— Eger alypsatarlyq operatsııalardyń belgileri baıqalsa, Ulttyq bank naryqtaǵy shamadan tys qubylmalylyqtyń aldyn alý maqsatynda valıýta ınterventsııalaryn júrgizýge daıyn, — dedi Á. Moldabekova.

Onyń aıtýynsha, qazirgi ýaqytta halyqaralyq rezervter kólemi valıýta naryǵyndaǵy jaǵdaıdy turaqtandyrýǵa tolyq jetkilikti.

— Ulttyq bank kvazımemlekettik sektor kompanııalary tarapynan shetel valıýtasyn qosymsha satýdy qamtamasyz etý sharalaryn júzege asyrýda. Jaqyn arada mundaı kompanııalardyń biri sheteldik ınvestorlardan alynǵan qaryz esebinen edáýir kólemde valıýta satýdy josparlap otyr. Bul valıýta naryǵyndaǵy teńgerimdilikke oń áser etedi, — dep túıindedi Álııa Moldabekova.

Eske sala keteıik, buǵan deıin qor bırjasynda dollar taǵy 3 teńgege qymbattaǵanyn jazǵan edik.