Qolma-qol aqshasyz tólemder úlesi 85,8 paıyzdan asady - Ulttyq bank

ASTANA. KAZINFORM – Qazaqstan Ulttyq banki «Ulttyq tsıfrlyq qarjy ınfraqurylymyn damytý týraly» (UTsQI) jyldyq esebin jarııalady.

Infraqurylymdy damytýdyń negizgi baǵyttary:

• Tsıfrlyq valıýtamen operatsııalardy qosa alǵanda, qaýipsiz ári úzdiksiz tranzaktsııalardy qamtamasyz etý.
• Bıometrııalyq sáıkestendirý men kelisimderdi basqarý úshin tsıfrlyq servısterdi engizý.
• Ashyq API arqyly qatysýshylar men qyzmetterdi jetkizýshiler arasynda qaýipsiz derek almasý.

2024 jyly UTsQI-dy damytýdaǵy negizgi baǵyt – tólem ınfraqurylymynyń jańa elementterin quryp, naryqqa qatysýshylar arasynda qaýipsiz jáne ózara ashyq is-qımyldy qamtamasyz etý úshin qoldanystaǵy ınfraqurylymdy qurý. Qazirgi ýaqytta QUB ınfraqurylymy táýligine 5,9 trln teńgege 350 000-nan astam tranzaktsııany óńdeıdi jáne aıyna 2,5 mln-nan astam tsıfrlyq sáıkestendirý operatsııasyn júrgizedi. 

Aıta keteıik, UTsQI operatory – QUB Ulttyq tólem korporatsııasy.

- Qazaqstan odan ári ekonomıkalyq damý úshin berik irgetas qura otyryp, qarjy qyzmetterin tsıfrlandyrýda aıtarlyqtaı jetistikter kórsetip otyr. Búginde eldiń barlyq tólem aınalymynyń 89,5 paıyzy Ulttyq bank júıeleri arqyly óńdeledi, al qolma-qol aqshasyz tólemderdiń úlesi 85,8 paıyzdan asady. Bul kórsetkish tsıfrlyq tehnologııalardyń qarjy salasyna enýiniń joǵary deńgeıin jáne eldiń zamanaýı sheshimderdi engizýge daıyndyǵyn kórsetedi, - delingen atalǵan esepte. 

Qarjy júıesin tsıfrlandyrýdyń negizgi ındıkatorynyń biri – qolma qol aqshasyz operatsııalardyń qarqyndy ósýi. 2024 jyly belsendi tólem kartalarynyń sany 8 paıyzǵa artty. Bul óz kezeginde halyqtyń qarjy tehnologııalaryna seniminiń joǵary deńgeıin baıqatty. 2024 jyldyń birinshi jartyjyldyǵynda árbir belsendi tólem kartochkasyn paıdalana otyryp, 1,9 mln teńge somasyna ortasha eseppen 154 qolma qol aqshasyz operatsııa júrgizilgen. 

Sonymen qatar, 2024 jyly POS-termınaldar sanynyń edáýir ósýi baıqaldy. Byltyr olardyń sany 24,6 paıyzǵa ósip, 1,16 mln qurylǵyǵa jetti. Bul damý bıznes úshinde, tutynýshylar úshin de elektrondy tólemderdi paıdalaný qolaılylyǵyn arttyrýǵa yqpal etedi. POS-termınaldar ınfraqurylymy tsıfrlyq ekonomıkany, ásirese shaǵyn jáne orta bıznesti yntalandyrýdyń mańyzdy quralyna aınaldy. 

Eske salsaq, jaqynda Ulttyq bank aqsha aıyrbastaý pýnktterin 2 jylda ǵımaratyn qaýipsiz etýge mindettedi.