Ulttyq bank tamyzda Ulttyq qordan 200–300 mln dollar satady
ASTANA. KAZINFORM — Shilde aıynyń qorytyndysy boıynsha teńge baǵamy 1 AQSh dollary úshin 473,81 teńgege deıin 1,3%-ǵa nyǵaıdy.
Qazaqstan qor bırjasyndaǵy saýda-sattyqtyń ortasha kúndik kólemi bir aıda 369 mln AQSh dollarynan 389 mln AQSh dollaryna deıin ulǵaıdy. Saýda-sattyqtyń jalpy kólemi 8,6 mlrd AQSh dollary.
Bırja naryǵynda Ulttyq qordan satylǵan valıýta kólemi shilde aıynda 200 mln AQSh dollary boldy. Ulttyq qordan satý úlesi saýda-sattyqtyń jalpy kóleminiń 2,3%-yn nemese kúnine shamamen 9 mln AQSh dollary.
Sonymen qatar, respýblıkalyq bıýdjetke transfertter bólý maqsatynda Ulttyq bank shilde aıynda Ulttyq qordan 500 mln AQSh dollaryn satyp aldy, olar Ulttyq qormen operatsııalardy teńestirý sheńberinde ishki valıýta naryǵynda 2026 jyldyń sońyna deıin birkelki satylatyn bolady.
Tamyz aıynda Ulttyq banktiń bırja naryǵynda Ulttyq qordan valıýta satý kólemi 200 mln AQSh dollarynan bastap 300 mln AQSh dollary.
Shilde aıynda teńestirý operatsııalary sheńberinde shamamen 374 mlrd teńge alyndy. Tamyz boıy osy maqsatta 374 mlrd teńge balamasynda valıýta satý kútilýde.
Ulttyq bank Ulttyq qor qarajatymen operatsııalar júrgizý kezinde, sondaı-aq teńestirý tetigin iske asyrý barysynda naryqtyq beıtaraptyq qaǵıdatyn saqtaıdy.
Ulttyq bank shilde aıynda valıýtalyq ınterventsııalar júrgizgen joq.
Ótken aıdyń qorytyndysy boıynsha kvazımemlekettik sektor sýbektileriniń valıýtalyq túsiminiń bir bóligin mindetti túrde satý normasy sheńberinde valıýtalyq túsimdi satý kólemi shamamen 195 mln AQSh dollary boldy. Bul normanyń qoldanylýy 2026 jylǵy 15 shildeden bastap toqtatyldy.
Ulttyq bank BJZQ zeınetaqy aktıvteriniń valıýtalyq úlesin ustap turý maqsatynda shilde aıynda bırjadaǵy saýda-sattyqta jalpy somasy 375 mln AQSh dollaryn nemese jalpy saýda-sattyq kóleminiń shamamen 4,4%-yn quraǵan shetel valıýtasyn satyp aldy. Aldaǵy sheshimder zeınetaqy aktıvterin ınvestıtsııalyq basqarý sheńberinde naryqtaǵy ahýaldy eskere otyryp qabyldanady.
Ulttyq bank transparenttilik qaǵıdaty aıasynda valıýta naryǵyndaǵy barlyq operatsııa týraly aqparatty aldaǵy ýaqytta da tolyq jarııalap otyrady. Qysqa merzimdi keleshekte teńge baǵamynyń dınamıkasy naryqqa qatysýshylardyń kútýlerine, toqsandyq salyq tólemderine, álemdik naryqtardaǵy ahýal men geosaıası jaǵdaıdyń ózgerýine baılanysty qalyptasady. Ulttyq bank qarjylyq teńgerimsizdikke jol bermeıtin jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustanýdy jalǵastyrady.
Aıta ketelik Ulttyq bank bazalyq mólsherlemeni 16,75% deńgeıinde belgilegen edi.
