Ulttyq bank shildede Ulttyq qordan 200–300 mln dollar satýdy josparlap otyr
ASTANA. KAZINFORM — Maýsymda Ulttyq qordan valıýta satylymy 200 mln dollardy qurady, dep habarlaıdy banktiń baspasóz qyzmeti.
Maýsym aıynyń qorytyndysy boıynsha teńge baǵamy 1 AQSh dollary úshin 479,98 teńgege deıin 1,3%-ǵa nyǵaıdy. Qazaqstan qor bırjasyndaǵy bir kúndik saýda-sattyqtyń ortasha kólemi bir aıda 392 mıllıonnan 369 mln AQSh dollaryna deıin tómendedi. Al jalpy saýda-sattyq kólemi 8,1 mlrd AQSh dollaryna jetti.
Maýsym aıynda bırja naryǵynda Ulttyq qordan 200 mln AQSh dollary kóleminde valıýta satyldy. Ulttyq qordan satylǵan kólemniń úlesi jalpy saýda-sattyq kóleminiń 2,6%-yn nemese kúnine shamamen 9 mln AQSh dollaryn qurady.
Jyl boıy bıýdjettik túsimder men shyǵystardyń birkelki bolmaıtynyn eskere otyryp, 2026 jylǵy maýsymnan bastap Qarjy mınıstrligine beriletin transfertter respýblıkalyq bıýdjettiń naqty qajettiligine qaraı bólinedi.
Bul tetik Ulttyq qordan satylatyn transfertterdiń jalpy kólemi valıýta naryǵynda Ulttyq bank tarapynan jyl sońyna deıin birkelki qalypta «aınalanatynyn» kórsetedi.
Osy maqsatta Ulttyq bank maýsym aıynda Ulttyq qordan 460 mln AQSh dollaryn satyp aldy. Bul qarajat Ulttyq qor operatsııalaryn «aınalaý» tetigi aıasynda 2026 jyldyń sońyna deıin ishki valıýta naryǵynda birkelki satylady.
— Bırja naryǵynda Ulttyq banktiń Ulttyq qordan shilde aıynda satatyn valıýta kólemi 200-den 300 mln AQSh dollaryna deıingi aralyqty quramaq. Maýsym aıynda aınalaý operatsııalary aıasynda shamamen 354 mlrd teńge aınalymnan alyndy. 2026 jylǵy ІІІ toqsan ishinde osy tetik aıasynda shamamen 1,1 trln teńgege balama somaǵa sheteldik valıýta satylady dep josparlanyp otyr. Ulttyq bank Ulttyq qor qarajatymen operatsııa júrgizgende de, aınalaý tetigin iske asyrǵanda da naryqta beıtarap bolý qaǵıdatyn qatań ustanady. Maýsym aıynda Ulttyq bank tarapynan valıýtalyq ınterventsııalar júrgizilgen joq, — delingen banktiń habarlamasynda.
Kvazımemlekettik sektor sýbektileri ózderiniń valıýtalyq túsimderiniń bir bóligin mindetti túrde satý talaby aıasynda ótken aıdyń qorytyndysy boıynsha satylǵan valıýtalyq túsimniń kólemi shamamen 423 mln AQSh dollaryn qurady.
BJZQ-nyń zeınetaqy aktıvterindegi valıýtalardyń úlesin turaqty ustap turý úshin Ulttyq bank maýsym aıynda bırjadaǵy saýda-sattyq kezinde sheteldik valıýta satyp aldy. Onyń jalpy somasy 92 mln AQSh dollaryn nemese jalpy saýda-sattyq kóleminiń 1,2%-ǵa jýyǵyn qurady. Aldaǵy ýaqytta buǵan qatysty sheshimder zeınetaqy aktıvterin ınvestıtsııalyq basqarý aıasynda naryqtaǵy ahýalǵa qaraı qabyldanady.
Ulttyq bank ashyqtyq qaǵıdaty aıasynda valıýta naryǵyndaǵy barlyq operatsııa týraly aqparatty aldaǵy ýaqytta da tolyq jarııalap otyrady. Qysqamerzimdi keleshekte teńge baǵamynyń dınamıkasy naryqqa qatysýshylardyń kútýlerine, toqsandyq salyq tólemderine, álemdik naryqtaǵy ahýal men geosaıası jaǵdaıdyń ózgerýine baılanysty qalyptasady. Ulttyq bank qarjylyq teńgerimsizdikke jol bermeıtin jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ary qaraı da ustana beredi.
Budan buryn Ulttyq bank tsıfrlyq teńge aınalymyn 1 trln teńgege jetkizetinin jazǵanbyz.
