Ulttyq bank pen qarjy naryǵyn retteý agenttigi BAÁ Ortalyq bankimen memorandýmǵa qol qoıdy

ASTANA. KAZINFORM - 2025 jylǵy 26 naýryzda Qazaqstan Respýblıkasynyń Qarjy naryǵyn retteý jáne damytý agenttiginiń tóraǵasy Mádına Ábilqasymova men Qazaqstan Ulttyq bankiniń tóraǵasy Tımýr Súleımenov Birikken Arab Ámirlikterine jumys sapary barysynda BAÁ Ortalyq bankiniń tóraǵasy Haled Mohamed Balamamen kezdesti.

Kezdesý barysynda taraptar Agenttik, Qazaqstan Ulttyq Banki jáne BAÁ Ortalyq Banki arasyndaǵy úshjaqty yntymaqtastyq týraly memorandýmǵa qol qoıdy. Qujat ekijaqty baılanystardy nyǵaıtýǵa jáne qarjy naryqtaryn damytý, qarjylyq tehnologııalar, tsıfrlyq qarjy qyzmetteri men ıslamdyq bankıng salasyndaǵy yntymaqtastyqty arttyrýǵa baǵyttalǵan.

Memorandýmǵa qol qoıý sonymen qatar Banktik qadaǵalaý jónindegi Bazel komıtetiniń 25-prıntsıpin iske asyrýǵa, bankterge transshekaralyq qadaǵalaýdyń tıimdiligin qamtamasyz etýge, sondaı-aq bank sektory salasyndaǵy ózara is-qımyldy keńeıtýge múmkindik beredi.

Qazirgi tańda Qazaqstan naryǵynda Birikken Arab Ámirlikteriniń ADCB bankiniń enshiles banki – «ADCB» Islam banki» AQ qyzmet atqarady. BAÁ-de ADCB bank sektory boıynsha aktıv kólemi jaǵynan 56 banktiń ishinde 3-orynda tur jáne joǵary kredıttik reıtıngke ıe («S&P» agenttiginiń «A» jáne «Fitch» agenttiginiń «A+» reıtıngi). 2025 jylǵy 1 qańtardaǵy jaǵdaı boıynsha ADCB aktıvteri 177,7 mlrd AQSh dollaryn qurady.

Osyǵan deıin Ulttyq bank basqarmasy valıýtalyq retteý máselelerine qatysty ózgeristerdi bekitkeni týraly jazdyq.