Ulttyq bank: naqty sektorda ekonomıkalyq belsendilik jaqsardy

ASTANA. KAZINFORM — 2025 jyldyń II toqsanynda kásiporyndarǵa júrgizilgen monıtorıngtiń nátıjeci týraly QR UB Aqsha-kredıt saıasaty departamentiniń dırektory Rústem Orazalınniń túsindirme aqparatyn jarııalady.

— Kásiporyndarǵa júrgizilgen monıtorıngtiń nátıjesi boıynsha 2025 jyldyń II toqsanynda daıyn ónim baǵasynyń ósý qarqyny báseńdep, shıkizat pen materıaldar baǵasy ózgergen joq, — delingen habarlamada.

Kásiporyndar óniminiń baǵa dınamıkasyn ólsheıtin dıffýzııalyq ındeks (DI) 59,4 boldy (2025 jylǵy I toqsanda — 59,7). 2025 jyldyń ІІІ toqsanynda kásiporyndar daıyn ónim, shıkizat pen materıaldar baǵasynyń ósý qarqyny báseńdeıdi dep kútedi.

Kásiporyndardyń basym bóligi úshin daıyn ónimniń baǵasyn belgileýdegi eń mańyzdy faktor — shıkizat pen materıal baǵasy jáne suranys. Shıkizat baǵasy ózgerissiz qalyp, DI 73,0 (2025 jylǵy I toqsanda — 73,0) deńgeıinde boldy.

Kásiporyndardyń daıyn ónimine degen suranys birshama tómendegenimen, ósim turǵysynan oń aımaqta qaldy (DI — 51,0). 2025 jyldyń ІІІ toqsanynda naqty sektordaǵy kásiporyndardyń kútýleri boıynsha taýar óndirý men kórsetiletin qyzmet sektorynda suranystyń ósý qarqyny jedeldeıdi.

Satý rentabeldiliginiń ortasha deńgeıi (paıyzdyq tólemder, salyq jáne amortızatsııa shyǵyndaryn shegergenge deıin) jalpy ekonomıka boıynsha 25,2%-ǵa (24,7%) deıin ósti, biraq tarıhı ortasha normadan (23,3%) joǵary qalyptasyp otyr.

Naqty sektor kásiporyndaryna júrgizilgen saýalnamalardyń jıyntyq baǵasyn bildiretin kompozıttik ozyńqy ındıkator (KOI) naqty sektorda ekonomıkalyq belsendiliktiń jaqsarǵanyn kórsetti.

II toqsanda saýalnamaǵa 3454 kásiporyn qatysty.

Buǵan deıin habarlanǵandaı, Ulttyq bank bankter úshin eń tómengi rezervtik talaptardy arttyrady.