Ulttyq bank marketpleısterde baǵa belgileý tájirıbesin zerttep jatyr
ASTANA. KAZINFORM — Marketpleısterde taýarǵa baǵa belgileýde halyqaralyq tájirıbe zerdelenip jatyr. Bul týraly elordada QR UB Aqsha-kredıt saıasaty departamenti Makroekonomıkalyq zertteýler jáne boljaý basqarmasynyń basshysy Islam Erjan aıtty.
Ulttyq banktiń saraptamalyq-taldaý klýbynyń otyrysynda jasandy ıntellektiniń belgili bir taýarlarǵa baǵa belgileý is-qımyldaryna aralasýyna qatysty suraq qoıyldy.
— Qazir jasandy ıntellekt qarqyndy damyp keledi. Negizinen, marketpleıster, sondaı-aq tutynýshylarmen ózara árekettesýdiń basqa da arnalary chat-bottarǵa negizdelgen modelge kóship jatyr. Máselen, Amerıkada árbir tutynýshyǵa belgili bir taýar úshin jeke baǵa belgileý tájirıbesine qarsylyq kúsheıip keledi. Al Ulttyq bank bul jaǵdaıǵa qatysty qandaı shara qoldanbaq? Mysaly, maǵan bir jeıde 25 000 teńge turýy múmkin, al dosym dál sol veb-saıttan, tipti dál sol profılde osy jeıdeni 24 000 teńgege kórýi yqtımal. Bul jaǵdaıda ár adam baǵany da ártúrli kóredi, — dep surady klýb otyrysyna kelgen mamandar Ulttyq bank ókilinen.
Óz kezeginde Islam Erjan qazir elimizdegi dúkenderge qatysty tıisti zertteý júrip jatqanyn aıtty.
— Bul jobamen 2018 jyldan beri aınalysyp kelemiz. Menińshe, aıtarlyqtaı tájirıbe jınaqtadyq jáne qazirgi kezde óte kóp dúkendi baqylap otyrmyz. Mysaly, biz jaqynda ǵana baqylaı bastaǵan Kaspi marketpleısinde satýshylardyń eń joǵarǵy orynǵa ıe bolý úshin baǵalaryn tómendetip, tipti bir teńge úshin de qyzý talasyp jatqanyn baıqadyq. Bul baǵytta jumys istep jatyrmyz, halyqaralyq ádistemelerdi zerdeleýge kiristik. Batys elderiniń birazy bul kezeńnen ótip qoıǵan. Máselen, qazirgi ýaqytta Ulybrıtanııanyń statıstıkalyq organynyń tájirıbesin qarastyryp jatyrmyz. Shynymdy aıtsam, chat-bottarǵa qatysty ár paıdalanýshy úshin jeke, biregeı baǵa belgilenetin jaǵdaıǵa áli tap bolǵan joqpyz. Degenmen, bolashaqta mundaı shekteýler paıda bola qalsa, basqa elderde bul másele boıynsha tıisti sheshim bolýy múmkin. Ondaı jaǵdaıda olardyń ádistemesin zerttep, sol tájirıbeni óz jumysymyzda qoldana alamyz, — dep túsindirdi QR UB Aqsha-kredıt saıasaty departamenti Makroekonomıkalyq zertteýler jáne boljaý basqarmasynyń basshysy.
Eske salsaq, AQSh-ta McDonald’s kompanııasyna qarsy ujymdyq talap-aryz túsken. Kompanııa jasandy ıntellektige negizdelgen baǵa belgileý júıesi arqyly óz meıramhanalarynda baǵalardy zańsyz túrde úılestirdi dep aıyptalyp otyr.
