Ulttyq bank krıptorezerv tujyrymdamasyn ázirlep jatyr

ASTANA. KAZINFORM – Memleket basshysy Qasym-Jomart Toqaevtyń bıylǵy Joldaýynda Ulttyq Banktiń bazasynda Memlekettik tsıfrlyq aktıvter qoryn (krıptorezerv) qurý jóninde tapsyrma berilgen bolatyn. Ulttyq banktegiler qazir bul jumys qandaı satyda ekenin málim etti.

- Qazir ýákiletti memlekettik organdarmen birlesip tujyrymdama ázirlenip jatyr. Onda qordy qalyptastyrý kózderi, ony jınaqtaý jáne paıdalaný tetikteri, sondaı-aq táýekelderdi basqarý men aktıvterdiń táýekel-profılin aıqyndaý tásilderi qarastyrylady. Erekshe nazar halyqaralyq tájirıbe eskerile otyryp, krıptovalıýta naryǵynyń qubylmalylyǵyn esepke alý arqyly qorlardy (krıptorezervti) basqarýdyń ashyqtyǵy, eseptiligi jáne qaýipsizdigin qamtamasyz etý máselelerine aýdarylady, - dep jazylǵan Kazinform saýalyna joldaǵan jaýapta.

Demek, ázirge krıptorezerv retinde naryqtaǵy qandaı krıptovalıýtalardan qor jınaqtaý kózdelip otyrǵany áli belgisiz. Sondaı-aq, krıptorezerv qalyptastyrýǵa qandaı kózden qarajat alynatyny, Ulttyq qordyń, BJZQ-nyń qarajatyn jumsaý yqtımaldyǵy da naqtylanbaǵan.

- Qordy qurý merzimderi men onyń jumys isteý tártibi tıisti tujyrymdamada belgilenedi, - dep jazady Ulttyq banktegiler.

Aıta ketsek, Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Memleket basshysynyń krıptoındýstrııany damytý jónindegi tapsyrmalaryn iske asyrý sheńberinde qandaı jumystar júrgizilip jatqanyn aıtqan edi.