Ulttyq bank krıptoaktıvterge salynýy múmkin qarajat somasyn atady

ASTANA. KAZINFORM — QR Ulttyq banki tóraǵasynyń orynbasary Berik Sholpanqulov Ulttyq qor men altyn-valıýta qory qarajatynyń bir bóligin krıptoaktıvterge salý múmkindigine qatysty túsinik berdi. 

Búgin Senatta «Qazaqstanda tsıfrlyq aktıvter ındýstrııasyn damytý» taqyrybyna arnalǵan jıynnan keıin tilshiler krıptoaktıvterge qansha qarajat baǵyttalatynyn surady.

— Bul krıptoaktıvter bizdiń aktıvtermen, baǵaly qaǵazdarmen uqsas. Eger ol perspektıvti jáne joǵary tabysty aktıv bolatynyna kóz jetkizsek, ıaǵnı bolashaqta ońtaıly nátıje beretinin kórsek, onda tıisti qarajatty salýdy qarastyramyz, — dedi Berik Sholpanqulov.

Bul turǵyda jýrnalıster osy baǵytta qansha qarajat qarastyrylǵany týraly suraq qoıdy.

— Qazir naqty aıtý qıyn. Degenmen, shamamen 300 mln AQSh dollary bolýy yqtımal. Atap aıtqanda, erteń osy soma bólinedi degendi bildirmeıdi. Osy protsesti zerttep jatyrmyz, — dedi Ulttyq bank tóraǵasynyń orynbasary.

Buǵan deıin habarlanǵandaı, krıptovalıýtalardy aıyrbastaıtyn uıymdar qurylady.