Ulttyq bank jalǵan banknotalardyń eń kóp taralǵan nomınalyn atady
ASTANA. KAZINFORM — Qazaqstan Ulttyq banki men ekinshi deńgeıli bankter 2026 jylǵy birinshi jartyjyldyqta 259 400 teńgeniń 57 jalǵan aqsha belgisin (49 banknota jáne 8 moneta) anyqtady. Bul 2025 jylǵy osy kezeńmen salystyrǵanda, 68,4%-ǵa az (96 jalǵan aqsha belgisi).
Kóbine nomınaly 2 000 teńgelik banknotalar qoldan jasalǵan — 22 dana, anyqtalǵan jalǵan aqshalardyń jalpy sanynyń — 38,6%-y. Odan keıingi orynda nomınaly 10 000 teńgelik banknota tur — 16 dana (28,1%), 5 000 teńgelik banknotada — 11 dana (19,3%), qalǵan 14% — monetalar.
Qazaqstan Ulttyq banki áleýmettik jeliler men messendjerlerde ulttyq valıýtanyń syrtqy belgilerine uqsaıtyn jáne «PRAZDNÝEM VMESTE!», «NE ıAVLıAETSıA PLATEJNYM SREDSTVOM» degen bógde jazýlary bar baspa ónimderin satyp alýǵa bolatyny týraly jarnamalar da bar ekenin eskertedi.
Osyǵan baılanysty, qolma-qol aqshany paıdalanǵan kezde banknotadaǵy jazýlarǵa aıryqsha nazar aýdaryp, olardyń túpnusqalyǵyn muqııat tekserip alǵan jón.
Maıda jazýlar óte buldyr bolady jáne úlkeıtip qaraǵanda oqyp tanýǵa kelmeıdi.
Jalǵan banknotada sýtamǵy belgisi bolmaıdy.
Patch elementiniń kólemi joq jáne jaı boıaýmen basyp shyǵarylady. Al odan sáýlelerdiń jan-jaqqa taralýy sekildi golografııalyq effektini de, nomınal beınesiniń oıý-órnekke aýysý qubylysyn da baıqaı almaısyz.
Qorǵanysh jiptiń dınamıkalyq jáne tús aýystyratyn áseri joq, jaryqqa tosyp qaraǵanda birtutas emes ekenine kóz jetkizýge bolady.
Aıta ketelik Qazaqstan qolma-qol aqshasyz tólemder boıynsha óńirde kósh bastap turǵany týraly jazǵan edik.
