Ulttyq Bank klıentterge bank kartasyn qorǵaý boıynsha keńes berdi
ASTANA. KAZINFORM – Qazaqstan Ulttyq Banki azamattardyń tólem kartalaryn olardyń ruqsatynsyz buǵattaý jaǵdaılarynyń kóbeıgenin habarlaıdy. Bul jaǵdaı telefon arqyly jasalatyn alaıaqtyq árekettermen baılanysty bolyp otyr.
Alaıaqtar ashyq derekkózderden, onyń ishinde fıshıngtik saıttardan, qoǵamdyq oryndardaǵy saýalnamalardan, áleýmettik jeliler men marketpleısterden alynǵan jeke málimetterdi paıdalanyp, qarjy uıymdarynyń baılanys ortalyqtaryna klıent atynan habarlasady. Olar bank kartasynyń joǵalǵanyn aıtyp, jalǵan aqparat arqyly kartany buǵattaýǵa sebep bolady.
Odan keıin alaıaqtar azamattarǵa qońyraý shalyp, ózderin banktiń nemese quqyq qorǵaý organdarynyń qaýipsizdik qyzmetkerleri retinde tanystyrady. Olar «kartany buǵattan shyǵaramyz» nemese «qaýipsiz shotqa aqsha aýdaramyz» dep sendirip, SMS-kod, ınternet-bankıng paroli nemese CVV/CVC kod sııaqty derekterdi alýǵa tyrysady.
Kartanyń buǵattalýy jaǵdaıynda, kartanyń ekinshi betinde nemese mobıldi qosymshada kórsetilgen resmı banktiń koll-ortalyǵyna habarlasý qajet. Qarjy uıymdarynyń qyzmetkerleri eshqashan SMS arqyly jiberilgen parol men kodtardy suramaıdy jáne mobıldi qurylǵyǵa qashyqtan basqarý qosymshalaryn ornatýdy talap etpeıdi.
Sonymen qatar bankomat mańynda júrgen alaıaqtar «kartam buǵattaldy», «kartamdy zaqymdadym» nemese «aqsha alý lımıti taýsyldy» degen túrli syltaýlarmen basqa adamnyń shotyna aqsha aýdarýǵa kómek surap, ornyna qosymsha syıaqy ýáde etedi. Mundaı aýdarymdar zańǵa qaıshy bolyp, dropperlik áreket retinde qaralýy múmkin.
Qazaqstan Ulttyq Banki bank kartasy men onyń derekterin eshkimge bermeýge, beıtanys adamǵa aqsha aýdarmaýǵa, árkez qyraǵy júrýge jáne kez kelgen aqparatty ekinshi deńgeıli bankterdiń resmı nómirleri arqyly koll-ortalyǵyna qońyraý shalyp, tekserip alýǵa keńes beredi.
Sonymen qatar Ulttyq Bank qyzmetkerleri jeke tulǵalardyń shottaryna qyzmet kórsetpeıtinin, aýdıo nemese vıdeo qońyraý shalmaıtynyn, ınvestıtsııalyq qorlar men qarjy ónimderine aqsha salýdy usynbaıtynyn, qarajatty saqtandyrýmen aınalyspaıtynyn jáne halyqpen aqshalaı esep aıyrysý operatsııalaryn júrgizbeıtinin eske salady.
Alaıaqtyqqa ushyraǵan jaǵdaıda Qazaqstan Respýblıkasynyń quqyq qorǵaý organdaryna aryzdaný qajet.
Qosymsha aqparat alý úshin 1477 qysqa nómirine qońyraý shalyp, Ulttyq Banktiń Baılanys ortalyǵyna habarlasýǵa bolady.
Eske sala ketsek, buǵan deıin Ulttyq banktiń retteýshi synaq alańynda jyljymaıtyn múlikti tokendeý jobasy iske qosylǵanyn jazǵan edik.