Ulttyq Bank ÚKI ınvestıtsııalyq monetasyn World Money Fair kórmesinde tanystyrdy
ASTANA. KAZINFORM – Qazaqstan Ulttyq Banki Berlınde ótken World Money Fair halyqaralyq aqsha kórme-konferentsııasynda ÚKI tsıfrlyq ınvestıtsııalyq monetasyn tanystyrdy.
Oǵan qatysýdaǵy negizgi maqsat – «ÚKI tsıfrlyq ınvestıtsııalyq monetasy» jobasyn álemdik deńgeıde tanystyrý, sonyń aıasynda ony iske qosý jáne júzege asyrý isindegi negizgi erekshelikterdi usyný.
Halyqaralyq sarapshylar jobanyń ınnovatsııalyq sıpatyn, qarjylyq saýattylyqqa negizdelgen baǵytyn, sondaı-aq Qazaqstan teńge saraıy shyǵarǵan ÚKI altyn ınvestıtsııalyq monetasynyń sapasy men eksklıýzıvti dızaınyn joǵary baǵalady. Monetanyń novatorlyq kontseptsııasyn Ulttyq Banktiń dızaınerleri ázirlep shyqty.
ÚKI ınvestıtsııalyq monetasy – altyn (Au 999,9), nomınaly 100 teńge, salmaǵy 31,1 gramm.
Bul monetalar Astana International Exchange (AIX) bırjasynyń «TABYS» mobıldi qosymshasy arqyly satylady. ÚKI tsıfrlyq ınvestıtsııalyq monetasy týraly tolyǵyraq aqparatty Ulttyq Banktiń saıtynan jáne YouTube arnasynan bile alasyz.
Anyqtama: World Money Fair – halyqaralyq moneta qaýymdastyǵyn jyl saıyn biriktiretin álemdegi eń iri nýmızmatıkalyq alań. Oǵan ortalyq bankterdiń, moneta saraılarynyń, moneta jabdyqtaryn óndirýshi kompanııalardyń ókilderi, dızaınerler, sondaı-aq iri nýmızmatıkalyq basylymdardyń mamandary qatysady. Ulttyq Bank bul sharaǵa 2000 jyldan beri jyl saıyn qatysyp keledi.