Ulttyq bank qazan aıynda Ulttyq qordan 600–700 mln dollar satýdy josparlap otyr
ASTANA. KAZINFORM — Qyrkúıektiń qorytyndysy boıynsha teńge baǵamy 1 AQSh dollary úshin 549,07 teńgege deıin 1,9%-ǵa álsiredi. Qazaqstannyń qor bırjasyndaǵy saýda-sattyqtyń ortasha bir kúndik kólemi bir aıda 217 mln AQSh dollarynan 248 mln AQSh dollaryna deıin ulǵaıdy. Jalpy saýda-sattyq kólemi 5,2 mlrd AQSh dollar boldy.
— Qyrkúıekte Ulttyq qordan 500 mln AQSh dollaryna valıýta satyldy. Bul respýblıkalyq bıýdjetke transfertter bólýdi, sondaı-aq «Taldyqorǵan-Úsharal» magıstraldyq gaz qubyrynyń ınfraqurylymdyq jobasyn qarjylandyrýdy qamtamasyz etýge múmkindik berdi. Ulttyq qordan satý úlesi jalpy saýda-sattyq kóleminiń 9%-yn nemese bir kúnde shamamen 24 mıllıon AQSh dollar boldy, — delingen Ulttyq bank habarlamasynda.
Kútiletin fıskaldyq túsimderdi eskergende, Úkimettiń aldyn ala boljamdy ótinimderi boıynsha qazan aıynda respýblıkalyq bıýdjetten transfertter bólý úshin Ulttyq bank Ulttyq qordan 600 mln AQSh dollarynan 700 mln AQSh dollaryna deıingi mólsherde valıýta satylady dep kútedi.
Buǵan deıin habarlanǵandaı, Ulttyq bank 2025 jyldyń basynan beri otandyq óndirýshilerden altyn satyp alý operatsııalaryn teńestire bastady. Qyrkúıekte 290 mlrd teńge alyndy.
— Sonymen qatar altyn baǵasynyń aıtarlyqtaı ósýi kezinde aınalaý aıasynda ótimdilikti alý kólemi altyn satyp alý operatsııalaryna baılanysty teńge emıssııasy kóleminen artta qalyp otyr. Osy jyldyń basynan beri jınaqtap alynbaǵan ótimdilikti eskere otyryp, aınalaý operatsııalary aıasynda IV toqsan ishinde 1,4 trln teńgege balama somada shetel valıýtasyn satý josparda bar.
Ulttyq qor qarajatymen operatsııalar júrgizý kezinde, sondaı-aq aınalaý tetigin iske asyrý kezinde Ulttyq bank naryqtyq beıtaraptyq qaǵıdatyn saqtaıdy, bul shetel valıýtasyn turaqty jáne birkelki satýdy bildiredi.
Ulttyq bank qyrkúıek aıynda valıýtalyq ınterventsııa júrgizgen joq, — delingen habarlamada.
Kvazımemlekettik sektor sýbektileriniń valıýtalyq túsimniń bir bóligin mindetti satý normasy aıasynda ótken aıdyń qorytyndysy boıynsha valıýtalyq túsimdi satý kólemi shamamen 378 mln AQSh dollar boldy.
BJZQ valıýta aktıvteriniń úlesi osyǵan deıingi josparǵa sáıkes shamamen 40% ekenin eskere otyryp, Ulttyq bank qyrkúıekte zeınetaqy aktıvteriniń ınvestıtsııalyq portfeline AQSh dollaryn satyp alǵan joq. Qazanda da valıýta satyp alý josparlanbaıdy.
— Ulttyq bank transparenttilik qaǵıdaty aıasynda valıýta naryǵyndaǵy barlyq operatsııa týraly tolyq aqparatty jarııalap otyrady. Qysqamerzimdi perspektıvada teńge baǵamynyń dınamıkasy naryqqa qatysýshylardyń kútýine, toqsan saıynǵy salyq tólemderine, álemdik naryqtardaǵy ahýalǵa jáne geosaıası ózgeristerge baılanysty bolady. Ulttyq bank teńgerimsizdiktiń jınaqtalýyna jol bermeıtin jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustanady, — delingen bank habarlamasynda.
Aıta ketelik Ulttyq bank qazaqstandyq úsh bankpen birlesip bankaralyq QR-tólemder servısin iske qosty.