Ulttyq bank: qazan aıynda teńge 3,5%-ǵa nyǵaıdy

ASTANA. KAZINFORM – Qazaqstan Ulttyq banki qazan aıyndaǵy valıýta naryǵynyń jaǵdaıy týraly aqparat usyndy. Aı qorytyndysy boıynsha teńge baǵamy 1 AQSh dollary úshin 529,96 teńgege deıin nyǵaıyp, 3,5%-ǵa ósken.

Qazaqstan qor bırjasyndaǵy saýda-sattyqtyń ortasha kúndik kólemi 248 mln AQSh dollarynan 271 mln dollarǵa deıin artty, al jalpy kólem 6 mlrd dollardy qurady.

Ulttyq qordan qazan aıynda 660 mln AQSh dollary satyldy. Bul respýblıkalyq bıýdjetke transfertter bólýdi jáne «Taldyqorǵan-Úsharal» magıstraldyq gaz qubyryn salýǵa baǵyttalǵan ınfraqurylymdyq jobany qarjylandyrýdy qamtamasyz etýge múmkindik berdi.

Ulttyq qordan valıýta satý úlesi jalpy saýda kóleminiń 11%-yn nemese kúnine shamamen 30 mln dollardy qurady.

Kútiletin fıskaldyq túsimderdi eskere otyryp, qarasha aıynda Ulttyq bank respýblıkalyq bıýdjetke transfertter bólý úshin Ulttyq qordan 600-700 mln AQSh dollary kóleminde valıýta satady dep boljap otyr.

- Aınalym operatsııalary sheńberinde qazanda 475 mlrd teńge qysqartyldy, qarashada da osy mólsherde operatsııa júrgizý josparlanǵan, - dep qosty qarjy uıymy.

Ulttyq bank Ulttyq qor qarajaty esebinen operatsııalar men aınalym tetigin iske asyrý kezinde naryqtyq beıtarap qaǵıdatyn ustanady, ıaǵnı shetel valıýtasy birkelki jáne turaqty túrde satylady.

Qazan aıynda Ulttyq bank valıýtalyq ınterventsııa júrgizgen joq.

Kvazımemlekettik sektor sýbektileri valıýta túsiminiń bir bóligin mindetti satý normasy aıasynda 279 mln AQSh dollaryn satty.

Zeınetaqy aktıvterindegi valıýtalyq úles shamamen 40% deńgeıinde saqtalýda. Osyǵan baılanysty Ulttyq bank qazanda AQSh dollaryn satyp alǵan joq jáne qarashada da satyp alý josparlanbaıdy.

Ulttyq bank transparenttilik qaǵıdaty aıasynda valıýta naryǵynda júrgiziletin operatsııalar týraly tolyq aqparatty ashyq jarııalaýdy jalǵastyrady.

- Qysqamerzimdi perspektıvada teńgeniń baǵamy naryq qatysýshylarynyń kútýlerine, toqsandyq salyq tólemderine, álemdik naryqtaǵy ahýal men geosaıası faktorlarǵa baılanysty bolmaq. Ulttyq bank teńgerimsizdikti boldyrmaıtyn jáne altyn-valıýta rezervteriniń turaqtylyǵyn qamtamasyz etetin ıkemdi baǵam saıasatyn ustana beredi, - delingen aqparatta.

Aıta keteıik, Qazaqstanda bazalyq mólsherleme óskenimen, ıpoteka berý kólemi de kóbeıgen.