Qazaqstannyń syrtqy boryshy qansha
ASTANA. KAZINFORM — Qazaqstan Ulttyq Banki 2025 jylǵy 1 qańtardaǵy jaǵdaı boıynsha derekterdi jarııalaýdan bastap Qazaqstan Respýblıkasynyń syrtqy boryshyn aldyn ala baǵalaýdy jarııalaýǵa kirisedi.
Syrtqy borysh belgili ýaqyttaǵy ótelmegen rezıdentterdiń beırezıdentter aldyndaǵy negizgi boryshty jáne/nemese paıyzdy tóleýdi talap etetin naqty jáne sózsiz mindettemelerin bildiredi.
Buǵan deıin Qazaqstan Ulttyq Banki Statıstıkalyq aqparattyń shyǵý kestesine sáıkes esepti toqsan aıaqtalǵannan keıin 90-kúni syrtqy borysh boıynsha esepti derekterdi jarııalaǵan bolatyn. Endi oǵan qosymsha QR syrtqy boryshyn aldyn ala baǵalaý jarııalanatyn bolady.
Mundaı jarııalanymdar toqsan saıyn esepti toqsannan keıingi aıdyń sońǵy kúninde, tıisti kezeń úshin tólem balansyn aldyn ala baǵalaý týraly aqparat shyǵarýmen bir mezgilde júzege asyrylady.
— Qazaqstan Ulttyq Banki jarııalanatyn statıstıkalyq jáne taldamalyq aqparat kólemin keńeıtý boıynsha turaqty jumys júrgizip keledi. Bul jarııalanym eldiń syrtqy sektordaǵy pozıtsııasyn neǵurlym ýaqytyly baǵa berýge múmkindik beredi jáne memlekettik organdarǵa, sarapshylarǵa, zertteýshilerge, reıtıngtik agenttikterge paıdaly bolady, — delingen habarlamada.
Qazaqstan Respýblıkasynyń syrtqy boryshynyń kólemi 2024 jyldyń basynan bastap jylda 2,3 mlrd AQSh dollaryna (budan ári — dollar) ulǵaıyp, 2024 jylǵy 1 qazanda 165,8 mlrd dollardy qurady.
2024 jyldyń basynan bastap syrtqy borysh tólem balansy boıynsha operatsııalardyń esebinen 3,1 mlrd dollarǵa ósip, teris baǵalyq, baǵamdyq jáne basqa ózgerister esebinen 0,8 dollarǵa teńestirildi.
Qazaqstannyń syrtqy boryshynyń qurylymynda óteý merzimi boıynsha 87,2% uzaq merzimdi (1 jyldan astam) syrtqy boryshqa tıesili, bul bir jaǵynan, ótimdilik táýekelderin azaıtady, al ekinshi jaǵynan — jalpy naryqtyq talaptar ózgerýiniń boryshty óteýge jáne oǵan qyzmet kórsetýge áserin kúsheıtedi.
Qazaqstan syrtqy boryshynyń qarjy quraldarynyń túrleri boıynsha qurylymynda beırezıdentterden tartylǵan nesıeler men kredıtter (74,1%) basym boldy.
— Sonymen 1 qańtardaǵy derekterge sáıkes Qazaqstannyń syrtqy boryshy 165 630 mln AQSh dollaryna teń boldy. Onyń ishinde memlekettik basqarý organdarynyń boryshy — 12 724 mln AQSh dollary, Ortalyq bank boryshy — 2 470 mln AQSh dollary, bankterdiń boryshy — 13 265 mln AQSh dollary, basqa sektorlardyki — 45 513 mln AQSh dollary jáne tikeleı ınvestıtsııalar: fırmaaralyq bereshek — 91 658 mln AQSh dollaryn qurady, — delingen bank taratqan aqparatta.
Bul rette 2025 jylǵy 1 qańtarǵa eseptik syrtqy borysh 2025 jyldyń 31 naýryzynda jarııalanady.
Budan buryn QR Ulttyq banki taldaýshylary Qazaqstan men aımaqtaǵy elderde mınımaldy rezervtik talaptardy qoldaný tıimdiligin zerdelegenin jazdyq.