Ulttyq bank ınflıatsııany 5%-ǵa túsirýdi kózdep otyr
ASTANA. KAZINFORM — Ulttyq bank ınflıatsııany 5%-ǵa deıin túsirýdi josparlap otyr. Ol úshin aqsha-kredıt saıasaty jalǵasyp, qajet bolsa qosymsha sharalar qabyldanady.
Bul týraly Ulttyq bankte ótken brıfıngte bank tóraǵasy Tımýr Súleımenov aıtty.
Onyń aıtýynsha, banktiń basty maqsaty — eldegi baǵa ósimin turaqtandyryp, ınflıatsııany 5%-ǵa deıin jetkizý.
— Bizdiń negizgi mindet — baǵa turaqtylyǵyn qamtamasyz etý jáne ınflıatsııany 5%-ǵa jetkizý. Inflıatsııanyń turaqty ári boljamdy deńgeıde bolýy ekonomıkanyń damýy men halyqtyń ál-aýqatynyń artýyna yqpal etedi, — dedi ol.
Onyń sózinshe, sońǵy aılarda ınflıatsııa baıaýlaǵanymen, baǵanyń ósýine áser etetin táýekelder áli de saqtalyp otyr.
— Buǵan halyqtyń belsendi tutynýy men ınflıatsııalyq kútýlerdiń joǵary bolýy sebep bolyp otyr, — dedi spıker.
Súleımenov bazalyq mólsherlemege qatysty kelesi sheshimder aldyn ala belgilenbeıtinin aıtty.
— Olar ınflıatsııanyń qalaı ózgeretinine, ishki suranysqa, janar-jaǵarmaı baǵasyna, bıýdjet shyǵystaryna jáne basqa da ekonomıkalyq kórsetkishterge qaraı qabyldanady, — dedi ol.
Sondaı-aq ol Úkimetpen birge ınflıatsııany bir tańbaly deńgeıge túsirýge baǵyttalǵan birlesken baǵdarlama júzege asyp jatqanyn aıtty. Qajet bolǵan jaǵdaıda bul sharalar qaıta qaralyp, tolyqtyrylatyn bolady.
Eske salaıyq, buǵan deıin Ulttyq bank bazalyq mólsherlemeni jyldyq 16,75%-ǵa deıin tómendetken bolatyn.
