Ulttyq bank ınflıatsııany 5%-ǵa deıin tómendetýdi kózdep otyr
ASTANA. KAZINFORM — Ulttyq bank tóraǵasy Tımýr Súleımenov Premer-mınıstr Oljas Bektenov tóraǵalyq etken Ekonomıkalyq saıasat jónindegi keńestiń otyrysyna qatysty. Jıynda makroekonomıkalyq turaqtylyqty qamtamasyz etý úshin ınflıatsııaǵa qarsy is-qımyldy úılestirý tetikterin jetildirý máseleleri qaraldy.
Otyrysqa qatysýshylar makroekonomıkalyq turaqtylyqqa jetý úshin ınflıatsııany 5%-ǵa deıin tómendetýge baǵyttalǵan qadamdardy talqylady.
Ulttyq bank tóraǵasy Tımýr Súleımenov ınflıatsııany 5%-dyq mejesine jetkizý — makroekonomıkalyq saıasattyń basty baǵyty bolyp qala beretinin qadap aıtty.
Inflıatsııalyq kútýlerdi turaqtandyrý men ınflıatsııany tómendetýdiń ornyqty baǵytyn qalyptastyrý maqsatynda Ulttyq bank ustamdy qatań aqsha-kredıt saıasatyn jalǵastyra beredi.
— Ustamdy qatań aqsha-kredıt saıasatynan bólek, Ulttyq bank qosymsha sharalar qabyldap jatyr, sonyń ishinde makroprýdentsııalyq sıpattaǵy sharalar da bar. Máselen, qabyldanǵan sheshimderdi barynsha ashyq, senimdi etý úshin Aqsha-kredıt saıasaty komıteti músheleriniń bazalyq stavkanyń boljanǵan traektorııasyna qatysty jeke baǵalary (jylyna 4 ret), sondaı-aq bazalyq stavka boıynsha qabyldanǵan sheshimdi talqylaý qorytyndysynyń qysqasha mazmuny (jylyna 8 ret) jarııalanyp otyrady. Bul sharalar Ulttyq banktiń ınflıatsııany 5%-ǵa jetkizý maqsatyna jetý jolyndaǵy qadamdaryn barynsha ashyq etýge múmkindik beredi, — delingen Ulttyq bank habarlamasynda.
Jyl basynan beri Ulttyq bank altyn satyp alýda monetarlyq beıtaraptyq ustanymyn ustanyp keledi. Bıylǵy maýsymǵa deıin sterılızatsııalanǵan aqsha kólemi 1,4 trln teńge balamasyna jetip, ınflıatsııa qysymyn azaıtýǵa yqpal etti.
Sondaı-aq azamattardyń kredıtterine kontrtsıkldik kapıtal býferin engizý týraly sheshim qabyldandy. Qazir bankterge qoıylatyn mınımaldy rezerv talaptaryn ósirý, qaryz júktemesiniń koeffıtsıenti men qaryzdyń tabysqa qatynasy sııaqty qosymsha retteý quraldaryn jetildirý baǵytynda belsendi jumys júrip jatyr.
Ekonomıkalyq saıasat jónindegi keńestiń otyrysynda kózdegen ınflıatsııa deńgeıine jetý úshin barlyq jaýapty memlekettik organ kelisilgen ári júıeli sharalar qabyldaýy qajet ekeni aıtyldy. Bul rette halyq pen bıznestiń senimin nyǵaıtý, ınflıatsııany kútýdi tómendetý men júrgizilip jatqan reformalardy barynsha tıimdi etý maqsatynda aqparat saıasatyn kúsheıtýge de nazar aýdarý qajet ekeni sóz boldy.
Otyrys qorytyndysy boıynsha keńes músheleri birlesip jumys isteýge ázir ekenderin, sonyń ishinde 2025-2026 jyldardaǵy ınflıatsııany baqylaý jáne tómendetýge baǵyttalǵan jańartylǵan sharalar keshenin Úkimettiń jeke qaýlysymen qabyldaýǵa daıyn ekenderin rastady. Ulttyq bank pen Úkimet baǵa turaqtylyǵy men makroekonomıkalyq tepe-teńdikti qamtamasyz etý úshin kúsh salady.