Ulttyq bank ınflıatsııamen qatań aqsha-kredıt saıasatyn júrgizý arqyly kúrespek
ASTANA. KAZINFORM — Ulttyq bank ınflıatsııany turaqtandyrý úshin keshendi shara qabyldap jatyr. Ol týraly tolyǵyraq tóraǵa Tımýr Súleımenov aıtyp berdi.
— Bıyl shilde aıynyń qorytyndysy boıynsha ınflıatsııa 11,8% boldy. Bul syrtqy turaqsyzdyqqa, baǵa men salyq reformasyna, aqsha massasynyń ulǵaıýyna baılanysty, — dedi Tımýr Súleımenov Úkimet otyrysynda.
Odan ári Ulttyq bank tóraǵasy ınflıatsııany turaqtandyrý úshin qabyldanyp jatqan keshendi sharalardy tizip shyqty:
— Qatań aqsha-kredıt saıasatyn júrgizý. Bul teńgedegi aktıvter men jınaqtardyń tartymdylyǵyn saqtaýǵa, tutyný kólemin tómendetýge arnalǵan;
— Fıskaldyq tártipti arttyrý. Jańa Bıýdjet jáne Salyq kodeksi qabyldandy. Maqsat — memleket qarjysynyń turaqtylyǵyn nyǵaıtý jáne bıýdjettiń Ulttyq qor transfertine táýeldiligin azaıtý. Sonymen qatar, «Inflıatsııany tómendetý sharalary kesheni» atty memlekettik qujat jańartylyp jatyr. Memleket qarjysynyń turaqtylyǵyn arttyrýǵa baǵyttalǵan birlesken jol kartasy daıyndalyp jatyr;
— Makro jáne mıkroprýdentsıaldyq sharalar. Qarjy naryǵyn retteý jáne damytý agenttigimen birge tutynýshylyq kredıtteý isin retteý jumysy júrgizilip jatyr. Tutynýshylyq kredıtteý boıynsha kapıtaldyń kontrtsıkldik býferi engizildi;
— Baǵa reformasy. Úkimetpen birge tarıfter men baǵa salasyndaǵy reformalardyń qarqynyn ıkemdi túrde beıimdeý máselesin talqylap, ortaq kelisim jasaldy;
— Aqsha-kredıttik retteý aıasyndaǵy qosymsha sharalar. Altyn satyp alý kezinde valıýtalyq operatsııalar.
— Bıyl 7 aı ishinde 1,7 trln teńge naryqtaǵy aqshalaı ótimdilik alyndy, jyl qorytyndysy boıynsha operatsııalar shamamen 3 trln teńgege jetedi. Eń tómengi rezervtik talaptar da kóterilip jatyr. Ol shamamen 3 trln teńgeni aınalymnan shyǵaryp, aqsha-kredıt saıasaty quraldary boıynsha shyǵyndy azaıtýǵa, aqsha bazasyn qysqartýǵa jáne dezınflıatsııalyq áserdi kúsheıtýge múmkindik beredi. Osy sharalardyń nátıjesinde barlyq memlekettik organmen kelisip áreket etsek, ınflıatsııany ortamerzimdi perspektıvada maqsatty kórsetkishke qaıtara alatynymyzǵa senimdimiz, — deıdi Tımýr Súleımenov.
Buǵan deıin Ulttyq bank basshysy Ulttyq qordan 2026-2028 jyldary tartylatyn transfert kólemin ataǵan edi.