Ulttyq bank fermerlerge nesıe beretin agrobank qurýǵa qarsy emes
Ulttyq bank agrobank qurýǵa qarsy emes. Degenmen, táýekelderdi durys anyqtaý qajet. Bul týraly Ulttyq bank tóraǵasynyń orynbasary Vıtalıı Týtýshkın aıtty, dep habarlaıdy Kazinform.
«Mamandandyrylǵan fgrobank qurý jaıyndaǵy usynys oqtyn-oqtyn kóteriledi. Esterińizge sala keteıin, Qazaqstanda aýyl sharýashylyǵyna ǵana kredıt beretin memlekettik te, jekemenshik te qarjy ınstıtýttary bolǵan. Degenmen, tájirıbe ońtaıly bola almady. Máselen, 2000 jyly QazAgroPrombank bankrot boldy, QazAgro qarjylyq shyǵynǵa batty», — dedi UB tóraǵasynyń orynbasary Májiliste ótip jatqan dóńgelek otyrys barysynda.
Sonymen qatar ol elimizde aýyl sharýashylyǵy jobalarynda basymdyqpen qarjylandyrǵan Delta bank, Tsesna bank syndy qarjy ınstıtýttary da jumysynyń nátıjesiz bolǵanyn basa aıtty.
«Sol sebepti joǵaryda atalǵan jaıttardy eskere otyryp, agrarlyq bankti qurýǵa kezekti márte tyrysqan kezde teńgerimdi sheshim qabyldaý qajet. Eger áleýettik táýekelderdi durys aıqyndap, durys basqarý strategııasyn anyqtaǵan jaǵdaıda mundaı qarjy ınstıtýtyn qurýǵa bolady. Bolashaq aktsıoner agrobanktiń jumysyna qatysty búkil shyǵyndardy moınyna alýǵa daıyn bolýy tıis», — dedi Vıtalıı Týtýshkın.
Osy oraıda ol agrarlyq banktiń jeke kapıtal esebinen qurylýyna kúmánmen qaraıtynyn jasyrmady.
«Sondyqtan da Úkimet nemese kvazımemlekettik sektor aktsıoner bolýy yqtımal. Jalpy, biz Ulttyq bank retinde eger mundaı sheshim qabyldansa qarsylyq tanytpaımyz. Biraq, atalǵan banktiń jumysymen baılanysty táýekelderdi durys anyqtaý jáne táýekelderdi basqarýdyń durys strategııasyn tańdaý qajet», — dedi UB tóraǵasynyń orynbasary.
