Ulttyq Bank eski úlgidegi 5 000 teńgelik banknotalardyń aınalymda qatar júrý kezeńin uzartady
ASTANA.KAZINFORM — Qazaqstan Ulttyq Banki 2011 jylǵy úlgidegi nomınaly 5 000 teńgelik banknotalar men 2023 jylǵy úlgidegi ózgertilgen dızaındaǵy nomınaly 5 000 teńgelik banknotalardyń aınalymda qatar júrý kezeńi 2025 jylǵy 24 qyrkúıekke deıin uzartylǵanyn habarlady.
«Aınalymda qatar júrý kezeńi aıaqtalǵannan keıin, ıaǵnı 2025 jylǵy 25 qyrkúıekten bastap barlyq bank pen Qazposhtada 3 jyl ishinde, al QUB fılıaldary eski úlgidegi banknotalardy jańa úlgidegi banknotalarǵa merzimsiz aıyrbastaıdy», — delingen Ulttyq bank habarlamasynda.
Aınalymda qatar júrý kezeńinde jańa úlgidegi jáne eski úlgidegi banknotalar zańdy tólem quraly bolyp qalatynyn, tólemder men aýdarymdar jasala beretinin, bank shottaryna aýdarý úshin Qazaqstan Respýblıkasynyń búkil aýmaǵynda olardyń ataýly quny saqtalatynyn jáne qabyldaýǵa jatatynyn atap ótemiz. Ol banknotalardyń barlyǵy QUB fılıaldarynda, Qazposhtada jáne elimizdegi ekinshi deńgeıli bankter men Qazaqstandaǵy beırezıdent bankterdiń fılıaldarynda esh shekteýsiz aıyrbastalady jáne aýystyrylady.
Qazaqstan Respýblıkasy ulttyq valıýtasynyń dızaıny ózgergen kezde aınalymdaǵy aqsha belgileriniń qatar júrý kezeńin aýystyrýǵa jáne belgileýge qatysty jalpy tártibi «Qazaqstan Respýblıkasynyń ulttyq valıýtasynyń aınalystaǵy aqsha belgileriniń dızaıny (nysany) ózgergen kezde olardy aýystyrý qaǵıdalaryn bekitý týraly» QUB-tyń 2015 jylǵy 19 jeltoqsandaǵy № 228 Basqarma qaýlysyna sáıkes júzege asyrylady.
Zańdy tólem quraly sanalatyn banknotalar men monetalardy qabyldaýdan bas tartý — Qazaqstan Respýblıkasynyń Ákimshilik quqyq buzýshylyq týraly Kodeksine sáıkes ákimshilik quqyq buzýshylyq bolyp tabylatynyn eske salamyz.
2011 jylǵy úlgidegi nomınaly 5 000 teńgelik banknota
2023 jylǵy úlgidegi nomınaly 5 000 teńgelik banknota
Eske sala keteıik, buǵan deıin Ulttyq Bank SHAŃYRAǴYŃYZ SHATTYQQA TOLSYN kollektsııalyq monetalaryn aınalymǵa shyǵardy.
