Ulttyq bank ekonomıkanyń bankterge táýeldiligin azaıtýdy kózdep otyr
ASTANA. KAZINFORM – Qazaqstan ekonomıkasynyń bank nesıelerine táýeldiligin azaıtyp, baǵaly qaǵazdar naryǵy men saqtandyrý salasy arqyly qarjy tartý múmkindigin keńeıtý kózdelip otyr. Osy baǵytta retteýshi organdar qazan aıynyń sońyna deıin eki baǵdarlamany bekitýdi josparlap otyr.
Bul týraly Astana Finance Days aıasynda Ulttyq bank tóraǵasy Tımýr Súleımenov aıtty.
Onyń sózinshe, qazir eldiń qarjy júıesinde bankterdiń úlesi basym. Jalpy qarjy naryǵynyń 80 paıyzdan astamy bank sektoryna tıesili. Al baǵaly qaǵazdar naryǵy, brokerler, dılerler, saqtandyrý kompanııalary jáne ózge qarjy uıymdarynyń úlesi shamamen 20 paıyz ǵana.
- Qazir ekonomıka negizinen bankterge súıenedi. Bankterdiń jaǵdaıy jaqsy bolsa, bızneske de qarjy bar. Al bank sektorynda qıyndyq týyndasa, onyń ornyn basatyn basqa qarjy kózderi az. Bul kóptegen elge tán jaǵdaı, – dedi Tımýr Súleımenov.
Aldaǵy ýaqytta Ulttyq bank muny birtindep ózgertip, bankten tys qarjylandyrý kózderiniń úlesin arttyrýdy kózdep otyr.
- Qazir bankterdiń úlesi 80 paıyzdan asady. Bolashaqta bul kórsetkish, mysaly, 60 paıyzǵa deıin tómendep, qalǵan bóligin baǵaly qaǵazdar naryǵy jáne ózge de qarjy quraldary tolyqtyrýy múmkin. Bul KASE nemese AIX bırjalary, aktsııalar men oblıgatsııalar, tokendelgen aktıvter nemese jańa qarjy quraldary bolýy yqtımal. Eń bastysy – naqty sektorǵa qarjy tartýdyń múmkindigin kóbeıtip, tek bank nesıesine táýeldi bolyp qalmaý, – dedi ol.
Tımýr Súleımenov bul ózgeris bank sektoryn qysqartý degendi bildirmeıtinin atap ótti.
- Bankter de óse bersin. Biraq sonymen birge bıznestiń qarjy tartýyna múmkindik beretin basqa tetikter de qatar damýy kerek, – dedi Ulttyq bank tóraǵasy.
Osy baǵytta Ulttyq bank Qarjy naryǵyn retteý jáne damytý agenttigimen birlesip, Prezıdenttiń tapsyrmasy boıynsha eki baǵdarlama ázirlep jatyr. Biri baǵaly qaǵazdar naryǵyn, ekinshisi saqtandyrý salasyn damytýǵa arnalǵan.
Súleımenovtiń aıtýynsha, eki baǵdarlama da qazan aıynyń sońyna deıin bekitiledi. Keıin baǵaly qaǵazdar naryǵy men saqtandyrý salasyna qatysty zań jobalary ázirlenedi.
Buǵan deıin Astana Finance Days aıasynda AHQO qazaqstandyq ekologııalyq jobalarǵa kómirtek birlikterin bırjada satýǵa múmkindik beretin kelisimge qol qoıatyny habarlanǵan.
