Ulttyq bank: ekinshi toqsanda bıznes pen ıpotekaǵa suranys artady
ASTANA. KAZINFORM — Qazaqstandaǵy bankter júrgizgen saýalnama nátıjesine sáıkes, 2026 jyldyń I toqsanynda bıznes tarapynan nesıege suranys azdap tómendegenimen, iri kompanııalar tarapynan ınvestıtsııalyq jobalarǵa qyzyǵýshylyq saqtalǵan. Al II toqsanda iskerlik belsendiliktiń artýyna baılanysty bıznes nesıesine suranystyń qaıta ósýi kútiledi. Bul týraly Ulttyq bank málim etti.
Іri, orta jáne shaǵyn bıznesti kredıtteý
QUB Qarjylyq turaqtylyq jáne zertteýler departamentiniń dırektory Oljas Kýbenbaevtyń túsindirmesinde 2026 jylǵy I toqsanda bankter bıznes sýbektileri tarapynan kredıtke degen jalpy suranys azdap tómendegeni aıtylǵan.
— Іri bıznes segmentinde bankterdiń bir bóligi ınvestıtsııalyq jobalar boıynsha keıinge qaldyrylǵan suranystyń bar ekenin jáne qaryz alýshylardyń aǵymdaǵy ekonomıkalyq jaǵdaılarda kútý pozıtsııasyn ustanatynyn alǵa tartty. Sonymen qatar, keıbir bankterde strategııalyq jobalardy qarjylandyrýǵa arnalǵan suranys kólemi aıtarlyqtaı óskeni baıqalady. Ol jalpy sandyq kórsetkishterge de áser etti. Osylaısha, iri bıznes sýbektileriniń kredıttik ótinim sany toqsannan toqsanǵa (t/t) 16%-ǵa ósip, 238-ge jetti, al olardyń ortasha mólsheri 80%-ǵa ósip, 18,8 mlrd teńge boldy, — delingen habarlamada.
Sarapshynyń pikirinshe, orta jáne shaǵyn kásipkerlik sýbektileriniń suranysy birshama tómendegen.
Al bankterdiń pikirinshe, ol buryn bólingen memlekettik qoldaý qarajatyn ıgerý men jyl basyndaǵy maýsymdyq faktorlarmen baılanysty. Bankter «Damý» kásipkerlikti damytý qory» AQ pen «Órleý» qorlandyrý baǵdarlamasynyń sharttaryna usynylǵan ózgeristerdi talqylap jatyr. Jańa Salyq kodeksi aıasynda keıbir jeke kásipkerlerdiń ózin-ózi jumyspen qamtyǵandar sanatyna aýysý yqtımaldyǵyna qatysty bankter bul ózgeristerdiń kredıttik belsendilikke qalaı áser etetinin baǵalaý úshin áli de ýaqyt qajet ekenin aıtady. Keıbir bankterdiń tsıfrlyq onlaın ónimderi esebinen orta bıznes segmentinde ótinim sany 5%-ǵa (t/t) ósip, 5,0 myń boldy. Ótinimderdiń ortasha mólsheri 15%-ǵa (t/t) ósti — 902 mln teńge. Shaǵyn bıznes segmentinde ótinim sany 5%-ǵa (t/t) tómendep, 912 myń boldy. Al olardyń ortasha mólsheri 11%-ǵa qysqaryp, 24,8 mln teńge deńgeıinde qalyptasty.
— Іri bıznes segmentinde kredıtterdi maquldaý úlesi 10 p. p. (t/t) tómendep, 55%-ǵa jetti. Bul, negizinen, toqsan sońynda túsken jáne áli qaralyp jatqan ótinimder sanynyń kóp bolýyna baılanysty. Orta jáne shaǵyn bıznes segmentterinde maquldaý úlesi sáıkesinshe 4 p. p. jáne 2 p. p. tómendep, 37% jáne 34% boldy, — dep túsindirdi Ulttyq bankten.
2026 jylǵy II toqsanda bankter iskerlik belsendiliktiń ósýine baılanysty iri bıznes sýbektileri tarapynan suranys artady dep kútedi.
Ipotekalyq jáne tutynýshylyq kredıtteý, avtokredıtter
2026 jylǵy І toqsannyń qorytyndysy boıynsha bankter ıpoteka men avtonesıe segmentinde suranys tómendegenin atap ótti. Al kepilmen qamtamasyz etilgen jáne kepilsiz tutynýshylyq qaryzdarǵa suranys aldyńǵy toqsan deńgeıinde qaldy.
Esepti toqsanda keıbir bankter syıaqy mólsherlemelerin kóterip, onyń ústine turǵyn úıdi paıdalanýǵa berý kólemi qysqarǵandyqtan, ıpotekalyq qaryzdarǵa suranys azaıdy. Osylaısha, ıpoteka boıynsha ótinim sany 21%-ǵa (t/t) azaıyp, 191 myń boldy. Al suralatyn qaryzdyń ortasha mólsheri — 20,5 mln teńge.
— Nesıe berý talaptary birshama kúsheıtilse de, bul jaǵdaı kepilmen beriletin tutynýshylyq nesıege degen suranys dınamıkasyn álsiretken joq. Ótinim sany 1%-ǵa (t/t) ósip, 103 myń boldy. Al qaryzdyń ortasha mólsheri 12%-ǵa (t/t), ıaǵnı 13,6 mln teńgege deıin ósti. Kepilsiz beriletin tutynýshylyq nesıe segmentindegi suranys ta ózgerissiz qalyp otyr: jalpy ótinim sany 2%-ǵa (t/t) azaıyp, 16,1 mln boldy. Al olardyń ortasha mólsheri 3%-ǵa (t/t) ósip, 963 myń teńgege jetti, — dep habarlady Ulttyq bankten.
Avtonesıe segmentindegi belsendiliktiń báseńdeýine jańa kólik baǵasynyń arzandaýy men sonyń áserinen avtodılerler usynatyn sýbsıdııalanatyn nesıe ónimderine suranystyń azaıýy sebep bolǵan. Osylaısha, ótinim sany 20%-ǵa (t/t) qysqaryp, 1,2 mln boldy. Al suralatyn somanyń ortasha mólsheri 12%-ǵa (t/t) ósip, 7,2 mln teńgege jetti.
Ipotekaǵa berilgen ónimderdi maquldaý deńgeıi 1 p. p. (t/t) ósip, 23% boldy. Sonymen qatar, maquldaý úlesi kepilmen qamtamasyz etilgen tutynýshylyq qaryzdar boıynsha 5 p. p. (t/t) tómendep — 17%-ǵa, avtonesıe boıynsha 1 p. p. (t/t) tómendep — 15%-ǵa, al kepilsiz qaryzdar boıynsha 1 p. p. (t/t) azaıyp — 32%-ǵa jetti.
2026 jylǵy ІІ toqsanda bankter ıpotekaǵa suranys artady dep kútedi. Bólshek nesıeleýdiń basqa segmentteri boıynsha suranys 2026 jylǵy І toqsan deńgeıinde saqtalady degen boljam bar.
2026 jylǵy I toqsanda kredıtteý boıynsha bankter arasynda júrgizilgen saýalnamaǵa ekinshi deńgeıli 21 bank qatysty. Saýalnamany Ulttyq Bank kredıttik resýrstarǵa suranys pen usynys arasyndaǵy ózgeristerdi baǵalaý úshin toqsan saıyn júrgizedi.
Eske sala keteıik, buǵan deıin Ulttyq bank 2027 jyldan bastap qaryz alýshylarǵa jańa lımıt engizilýi múmkin ekenin habarlady.
