Ulttyq bank BJZQ-nyń ınvestıtsııa tabysy týraly: Ahýal turaqtandy

ASTANA. KAZINFORM — Ulttyq banktiń Monetarlyq operatsııalar departamentiniń dırektory Nurjan Tursynhanov BAQ-ty Biryńǵaı jınaqtaýshy zeınetaqy qorynyń ınvestıtsııalyq tabysyn 3 aılyq merzimmen eseptemeýge shaqyrdy.

— Qazir ahýal retteldi. Investıtsııalyq tabyspen baılanysty problema joq. Jýrnalısterdi de úndeımin. Ádette jyl basynda BJZQ-nyń tabystylyǵy týraly másele kóterile qalady. Qańtar, aqpan aılarynda oblıgatsııalardyń kýpondarynan tabys jınaqtap úlgermeımiz. Biraq tabystylyq týraly suraqtar jeltoqsanda eshkim suraq qoımaıdy. Óıtkeni ol kezde 11 aıda kýpondardan jınaqtalǵan tabys shottarda jatady. Qańtar, aqpan kezinde qubylmalylyq bolǵanymen, jańaǵy tabys ony jaýyp ketedi. Sondyqtan 2-3 aıdyń qorytyndysy boıynsha tabystylyqty esepteý azdap durys emes. Ondaı esepter arqyly salymshylarymyzǵa azdap jalǵan aqparat beremiz, — dedi ol baspasóz máslıhatynda.

Onyń sózinshe, BJZQ-nyń 12 aıdaǵy tabystylyǵy 12 paıyzdaı bolǵan. 

— Bul kezde ınflıatsııa 10 paıyz bolǵan. Sonda keıingi 12 aıdaǵy naqty tabystylyq 2 paıyz bolyp otyr, — dedi Nurjan Tursynhanov.

Osy is-sharada «Biryńǵaı jınaqtaýshy zeınetaqy qory» aktsıonerlik qoǵamynyń basqarýshy dırektory Murat Sháripov zeınetaqy jınaǵynyń bir bóligin merziminen buryn paıdalaný tetigin toqtaý týraly usynystarǵa jaýap berdi.