Ulttyq bank biryńǵaı QR júıesiniń jumysyn túsindirdi

Júıege tolyqtaı tehnıkalyq qyzmet kórsetetin Operator — Ulttyq banktiń enshiles uıymy — Ulttyq tólem korporatsııasy (UTK). UTK-nyń basty mindeti — bankke, halyq pen kásipkerge teń múmkindik beretin, táýelsiz ári úzdiksiz jumys isteıtin tólem ortasyn qurý.

Bul júıe klıentke qyzmet kórsetip, tólem qabyldaýda kásipkerlerdiń múmkindigin keńeıtedi degen sóz. Endi tólem kartalarymen shektelmeı, qolda bar termınal arqyly kez kelgen basqa bankten QR-tólemder qabyldaı berýge bolady.

Satyp alýshy úshin Biryńǵaı QR boıynsha tólem jasaý — tegin.

Bul rette zańnamada mańyzdy talap bar: bankaralyq tólem kezinde Biryńǵaı QR arqyly oryndalatyn tólem komıssııasy bıznes úshin ózge banktiń kartasymen tólem jasaǵan kezde ustalatyn komıssııadan joǵary bolmaýǵa tıis. Osylaısha, kásipkerler Biryńǵaı QR arqyly tólem qabyldaǵanda basqa kez kelgen banktiń kartasymen jasalǵan uqsas tranzaktsııa qunynan artyq shyǵyn ákelmeıtinine kepildik beriledi.

Eger satyp alýshy men satýshynyń termınalyna bir bank qyzmet kórsetse, tarıfti sol banktiń ózi belgileıdi. Eger bankter ártúrli bolsa, kásipker úshin komıssııa bylaı qalyptasady:

— 1%-y — satyp alýshynyń bankine ketedi (satyp alýshynyń bankine satýshynyń banki tóleıtin interchange bankaralyq komıssııasy). Onyń bir bóligin bank klıentterge bonýs pen keshbek túrinde qaıtara alady. Komıssııanyń osy bóligi bonýs baǵdarlamalaryn qarjylandyrady;

— Qalǵan somany qolma-qol aqshasyz tólem qabyldaǵany úshin kásipkerge qyzmet kórsetýshi bank alady.

— Osy somadan satyp alýshynyń banki men men kásipkerdiń banki júıege operatorlyq qyzmet kórsetkeni úshin UTK-ǵa tóleıdi: telefon nómiri arqyly oryndalatyn aýdarymǵa — 0 teńge, al Biryńǵaı QR boıynsha tólemge — 0,05%. Osylaısha, UTK telefon nómiri arqyly óńdeletin bankaralyq aýdarymdar úshin bankten de, olardyń klıentinen de eshqandaı komıssııa ustamaıdy, — delingen habarlamada.

Bankter de kásipkerlik sýbektisi sanalatynyn aıta ketken jón. Olar ınfraqurylymyn damytyp, POS-termınaldaryn ornatýǵa jáne basqa da qyzmetterge jumsalatyn shyǵyndardy ózi kóteredi. Osyǵan baılanysty kez kelgen báseke ortasy sekildi kásipkerlerge komıssııa belgileıdi.

Sonymen qatar, Ulttyq bank jańa júıeniń jumysy men bankterdiń tarıf saıasatyn muqııat baqylap otyr. Bunyń bári júıeli jumysqa jatady jáne ol ońtaıly sheshim shyǵarý úshin jasalady. Buǵan deıin de Ulttyq bank halyqaralyq tólem júıelerimen (Visa, Mastercard, UnionPay) jáne banktermen birlesip, eki jyl ishinde tólem kartalarynyń barlyq sanatyndaǵy bankaralyq komıssııany (interchange) kezeń-kezeńimen 2 ese tómendetti: jalpyǵa ortaq karta — 1,8%-2,0%-dan 1%-ǵa deıin, premıým karta — 2,4%-dan 1,2%-ǵa deıin; sýperpremıým karta — 2,45%-dan 1,4%-ǵa deıin.

— Biryńǵaı QR arqyly tólem jasaýdy jeńildetetin jańa tásil kásipker úshin qolma-qol aqshamen, bank kartasymen jáne bankishilik QR-men esep aıyrysý sııaqty úırenshikti ádisterge qosymsha múmkindik beretinin aıta ketken jón. Bıznes ózi tańdaıdy: óz qalaýy men klıentke yńǵaıly bolsa, birneshe banktiń POS-termınalyn ári qaraı qoldana berýge de bolady nemese barlyq tólemdi bir termınalǵa biriktirýge bolady. Osylaısha, Biryńǵaı QR-dyń paıda bolýy ádettegi tólem ádisterin shektemeıdi, kerisinshe, olardy keńeıtip, bıznes pen tutynýshyǵa erkin tańdaý jasaýǵa múmkindik beredi, — delingen bank habarlamasynda.

Ulttyq banktiń málimetinshe bıylǵy 17 shildeden beri júıe arqyly 1 mıllıonǵa jýyq tranzaktsııa óńdelgen.

Aıta ketelik elde biryńǵaı QR-kodty kim retteıtini týraly jazǵan edik.