Ulttyq bank bólip tóleý naryǵyn retteýdiń jańa joldaryn qarastyryp jatyr
ASTANA. KAZINFORM — Elimizde bankter men mıkroqarjy uıymdarynan tys usynylatyn bólip tóleý qyzmetterin retteý máselesi talqylanyp jatyr. Usynystardyń biri — mundaı mindettemeler týraly aqparatty kredıttik bıýrolarǵa jiberý.
Bul týraly Ulttyq bank tóraǵasynyń orynbasary Aqyljan Baımaǵambetov málimdedi. Onyń aıtýynsha, Ulttyq bank bólip tóleý jáne keıin tóleý qyzmetteriniń naryǵyn retteý jónindegi dıskýssııalyq qujatqa qatysty usynystar qabyldaýdy aıaqtady. Qazir túsken pikirler men usynystar saralanyp jatyr.
Retteýshi bankter men mıkroqarjy uıymdary arqyly rásimdeletin bólip tóleý qyzmetteri qoldanystaǵy zańnama aıasynda ekenin atap ótti. Al qarjy uıymdaryna jatpaıtyn kompanııalar usynatyn osyndaı qyzmetterge qatysty birqatar másele bar.
Atap aıtqanda satyp alýshyǵa kelisim talaptaryn tolyq túsindirý, ósimpul men aıyppul esepteý tártibi jáne azamattardyń jalpy qaryz júktemesin baǵalaý máseleleri qarastyrylyp otyr.
— Máselen bólip tóleý týraly aqparatty kredıttik bıýroǵa jiberý qajettigi talqylanyp jatyr. Sonda mundaı mindettemeler qoljetimdi bolyp, nesıege barynsha uqsas quraldar boıynsha azamattardyń qaryz júktemesin esepteý kezinde eskerilýi múmkin, — dedi Aqyljan Baımaǵambetov.
Onyń aıtýynsha, keıbir usynysty normatıvtik aktiler arqyly júzege asyrýǵa bolsa, basqalary zańnamaǵa ózgeris engizýdi jáne Úkimettiń qatysýyn talap etýi múmkin.
Qazir Ulttyq bank usynystardyń naryqqa yqpalyn baǵalap jatyr. Kelesi kezeńde bul máselelerdi Qarjy naryǵyn retteý jáne damytý agenttigimen talqylaý josparlanǵan.
Ulttyq bank ókili ázirge túpkilikti sheshim qabyldanbaǵanyn atap ótti. Sondyqtan usynylyp otyrǵan talaptar qoldanysqa engiziledi dep aıtýǵa áli erte.
Aıta keteıik, Ulttyq bank ekonomıkanyń bankterge táýeldiligin azaıtýdy kózdep otyr.
