Ulttyq bank bólip tóleý naryǵyn retteýdi usyndy
ASTANA. KAZINFORM – Qazaqstan Ulttyq banki bólip tóleý jáne BNPL (Buy Now, Pay Later – «qazir satyp al, keıin tóle») ónimderi naryǵyn taldaýǵa arnalǵan pikirtalas qujatyn jarııalap, osy salany retteýdiń yqtımal tetikterin talqylaýdy usyndy.
Ulttyq bank naryq qatysýshylaryn qazirgi tájirıbelerdi, yqtımal táýekelderdi jáne olardy azaıtýǵa baǵyttalǵan retteý sharalaryn talqylaýǵa shaqyrdy.
Qazir Qazaqstanda bólip tóleý tásili kúndelikti tutyný taýarlarynan bastap avtomobıl men jyljymaıtyn múlik sekildi qymbat taýarlardy satyp alýǵa deıin keńinen qoldanylady.
Ulttyq bank bólip tóleý formaldy túrde tólem tásili bolǵanymen, satyp alýshy úshin belgili bir qarjylyq mindettemeler týǵyzatynyna nazar aýdardy.
Sońǵy jyldary bankter men mıkroqarjy uıymdary usynatyn bólip tóleý ónimderimen qatar qarjylyq emes uıymdardyń da osyǵan uqsas qyzmetteri keńinen tarala bastaǵan. Olardyń qataryna BNPL-provaıderler arqyly jasalatyn mámileler, satýshylardyń tikeleı bólip tóleýi jáne keıinnen satyp alý quqyǵymen jalǵa berý tetikteri kiredi.
– Mundaı tetikter tólemdi birneshe bólikke bólip, taýar satyp alýǵa múmkindik beredi. Alaıda qarjylyq emes uıymdar usynatyn bólip tóleý ónimderine qarjylyq qyzmetterdi tutynýshylardyń quqyqtaryn qorǵaýǵa qatysty talaptar qoldanylmaıdy. Bul halyqtyń qosymsha boryshtyq júktemesiniń qalyptasýyna yqpal etýi múmkin. Negizgi mindet – qyzmetterdiń qoljetimdiligin saqtaı otyryp, osy táýekelderdi barynsha azaıtatyn tetikterdi ázirleý, – delingen Ulttyq bank qujatynda.
Osyǵan baılanysty retteýshi naryqtyń múddeli qatysýshylarynan pikirtalas qujatynda kóterilgen máseleler boıynsha usynystar men pikirler qabyldaıdy.
Qujatty qoǵamdyq talqylaý segiz aptaǵa sozylady. Pikirler men usynystar 2026 jylǵy 3 qarashaǵa deıin qabyldanady.
Pikirtalas qujaty Qazaqstan Ulttyq bankiniń resmı saıtynda jarııalanǵan.
Aıta keteıik, Ulttyq bank ekonomıkanyń bankterge táýeldiligin azaıtýdy kózdep otyr.
