Ulttyq bank bazalyq stavkany tómendetý sebebin túsindirdi

ASTANA. KAZINFORM – Búgin elimizde bazalyq stavka 15,25%-ǵa tómendedi. Onyń sebebin Ulttyq bank tóraǵasy Tımýr Súleımenov túsindirip berdi.

«2023 jyldyń qorytyndysy boıynsha jyldyq ınflıatsııa 9,8% qurady. Onyń tómendeýine birqatar faktor túrtki boldy. Sol sııaqty Ulttyq banktiń aqsha-kredıt saıasaty jáne Úkimettiń ınflıatsııaǵa qarsy sharalary oń áserin berdi, birneshe salalarda baǵa turaqtady. Álemdegi ınflıatsııalyq qysymnyń álsireýi de elimizdegi ınflıatsııanyń tómendeýine yqpal etip otyr», - dedi Tımýr Súleımenov bankte ótken brıfıngte.

Onyń aıtýynsha, elimizde ınflıatsııa dınamıkasy Ulttyq banktiń boljamyna sáıkes qalyptasyp keledi.

«Azyq-túlik ınflıatsııasy 8,5%-ǵa tómendedi. Azyq-túlikke jatpaıtyn taýarlar baǵasynyń ósýi 9,1%-ke deıin baıaýlady. Qyzmetter ınflıatsııasy «Tarıfti ınvestıtsııaǵa aıyrbastaý» baǵdarlamasyn júzege asyrý jáne tarıfterdiń kóterilýi jaǵdaıynda 12,4%-ke deıin ósti. Byltyr jeltoqsan aıynda aılyq ınflıatsııa 0,8%-ti qurady, bul 0,7% quraıtyn ortasha jyldyq dınamıkadan sál joǵary. Ótken jyldyń qorytyndysy boıynsha aldaǵy bir jylda kútiletin ınflıatsııanyń medıanalyq kórsetkishi birshama tómendep, 16,4%-ti qurady. Respondentter bolashaqta baǵanyń yqtımal ósýine tamaq ónimderi men janar-jaǵarmaı baǵasynyń ózgerýi sebep»,- dep atap ótti spıker.

Odan bólek, tóraǵa ekonomıka salalary dınamıkasynyń ósip jatqanyn aıtty.

«Munaı óndirýdiń ulǵaıýy, tamaq ónimderi óndirisiniń keńeıýi, jeńil ónerkásip pen mashına jasaýdyń ósýi jaǵdaıynda ónerkásip sektoryndaǵy óndiris kólemi 4,3%-ke artty. 13,3%-ǵa ósken qurylys salasy men 7,1%-ǵa ósken aqparat jáne baılanys salalary da ekonomıkaǵa oń úles qosýda», - deıdi T. Súleımenov.

Ulttyq bank tóraǵasy syrtqy sektorda ınflıatsııalyq qysymnyń álsireýi jalǵasyp jatqanyn jetkizdi. Atap aıtqanda:

Reseı - ınflıatsııanyń dınasmıkasy erekshe nazar aýdarýdy qajet etedi. Onda kórsetkish 7,4%-dy qurap, ishki suranystyń tez ósýine jáne ınflıatsııalyq kútýlerdiń joǵarylaýyna sebep boldy. Osynyń barlyǵy aqsha-kredıt saıasatyn odan ári qatańdatýdy talap etti. Ózderińiz biletindeı, ótken jyldyń sońynda negizgi mólsherlemeni 16%-ǵa deıin kóterdi.

Eýroodaq - Eýropa ortalyq bankiniń tejeý saıasaty jaǵdaıynda ınflıatsııanyń baıaýlaý úrdisi baıqalady, 3,1%. Degenmen, 2% targetke 2026 jyly ǵana qol jetkizý múmkin degen boljam bar. ıAǵnı, joǵary paıyzdyq mólsherlemeler uzaq ýaqyt boıy saqtalady dep kútiledi.

AQSh - Federaldy rezervtik júıe ınflıatsııanyń tómendeýine qaramastan AQSh-taǵy ınflıatsııa áli de joǵary jáne ornyqty ekenin atap ótti. Retteýshiniń rıtorıkasyna sáıkes aqsha-kredıt sharttary ınflıatsııanyń targetke jaqyndaý belgileri baıqalǵanǵa deıin tejeý aımaǵynda saqtalady. Olarda da 2% quraıdy. Qajet bolǵan jaǵdaıda aqsha-kredıt saıasaty qatańdatylýy múmkin ekenin de joqqa shyǵarmaıdy.

Qytaı - Qazaqstannyń taǵy bir saýda seriktesi – Qytaıda ekonomıkalyq belsendiliktiń álsiz kórsetkishteri jaǵdaıynda úsh aı qatarynan deflıatsııa baıqalýda – 0,3%.