Ulttyq Bank bazalyq stavkany tómendetti
ASTANA. KAZINFORM – Bıylǵy aqpan aıynda jyldyq ınflıatsııa 9,3% deıin baıaýlady jáne Ulttyq bank bazalyq stavkany 14,75% deıin tómendetti. Bul týraly QR Ulttyq bank tóraǵasy Tımýr Súleımenov aıtty.
«2024 jylǵy aqpanda jyldyq ınflıatsııa 9,3% deıin baıaýlady. Inflıatsııa men ınflıatsııalyq kútýlerdiń tómendeýine baılanysty Ulttyq Bank aqpanda bazalyq stavkany 14,75% deıin, ıaǵnı 50 bazalyq tarmaqqa tómendetti», - dedi T. Súleımenov Úkimettiń búgingi otyrysynda.
Sonymen birge, spıker jyldyq ınflıatsııanyń baıaýlaý qarqyny azaıǵanyn atap ótti. Aqpanda aılyq ınflıatsııa ortasha tarıhı mánderden joǵary qalyptasty. Maýsymdyq jáne ákimshilik faktorlardan basqa naryqtyq taýarlar men qyzmetter baǵasy tez ósken.
«Qazirgi jaǵdaıda aqsha-kredıt saıasatyn jumsartý múmkindigi aıtarlyqtaı shekteýli. Inflıatsııa faktorlarynyń qalyptasqan balansy, onyń aılyq qarqynynyń dınamıkasy aldaǵy ýaqytta sheshim qabyldaýda bazalyq stavkanyń sol deńgeıde saqtalý yqtımaldyǵyn arttyryp otyr. Derekterdi jınaý, ekonomıkalyq jáne fıskaldyq reformalardyń iske asyrylýyn monıtorıngteý qajet», - dedi Ulttyq bank tóraǵasy.
