Ulttyq bank bazalyq stavkany 14,25% deıin tómendetti
ASTANA. KAZINFORM — Ulttyq banktiń aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 14,25% deıin 25 bazıstik tarmaqqa tómendetý jóninde sheshim qabyldady.
Bıylǵy mamyr jáne maýsymda jyldyq ınflıatsııa, Ulttyq banktiń boljamdary sheginde olardyń ortalyq máninen tómen qalyptasyp, birtindep tómendep keledi. Halyqtyń ınflıatsııalyq kútýleri sáýirdegi joǵary mánderden keıin tómendedi.
Álemdegi azyq-túlik baǵasynyń ósýi men Reseıde ınflıatsııanyń jedeldeýine baılanysty syrtqy ınflıatsııalyq jaǵdaı qolaısyzdaý bolyp otyr. Іshki ekonomıkada fıskaldyq yntalandyrý men tutynýshylyq kredıtteý qoldaıtyn turaqty ishki suranystyń, sondaı-aq jalǵasyp jatqan retteletin baǵalar reformasynyń saldarynan ınflıatsııalyq qysym saqtalýda.
Ulttyq bank kelip túsetin derekterdi, sonyń ishinde baǵa ósýiniń turaqty bóligin jáne jalpy ınflıatsııanyń targetke jaqyndaý traektorııasyn baqylaıtyn bolady. Aldaǵy tamyz aıynda bolatyn boljamdy raýnd aıasynda fıskaldyq saıasattyń parametrlerin qosa alǵandaǵy qalyptasatyn táýekelder balansy, sondaı-aq baǵamdyq faktordyń saldarynan aqsha-kredıt sharttarynyń jumsarý áseri baǵalanady. Baǵa ósýiniń báseńdeý úrdisin bekitý úshin jáne ınflıatsııa boıynsha 5%-dyq maqsatqa qol jetkizý úshin aqsha-kredıt sharttary uzaq ýaqyt boıy ustamdy qatań qalpynda saqtalady.
Jyldyq ınflıatsııa 2024 jylǵy maýsym aıynda 8,4%-ǵa deıin tómendedi jáne Ulttyq banktiń boljamdary sheginde olardyń ortalyq máninen tómen qalyptasty.
Baǵa ósýiniń baıaýlaýyna azyq-túlik taýarlarynyń tómenirek ınflıatsııasy, sondaı-aq tarıftik reformany iske asyrý qarqynynyń báseńdeýi negizgi úles qosýda. Osyǵan qaramastan, jyldyq ınflıatsııa quramynda «Tarıfti ınvestıtsııaǵa aıyrbastaý» baǵdarlamasy jáne naryqtyq qyzmetterdiń qymbattaýy aıasynda aqyly qyzmetterdiń baǵasy barynsha ósip keledi.
Maýsymda aılyq ınflıatsııa 0,4%-ǵa deıin baıaýlap, ortasha tarıhı mánderden tómen (0,5%) qalyptasty. Bazalyq jáne maýsymdyq faktorlar eskerilmegen ınflıatsııanyń kórsetkishteri aldyńǵy aılardaǵy tómendeýden keıin maýsymda azdap ósti.
Halyqtyń ınflıatsııalyq kútýleri qubylmaly: olar sáýirdegi joǵary mánderinen tómendedi, alaıda teńge baǵamynyń azdap álsireýine baılanysty maýsym aıynda birshama ósti. Qarjy naryǵynyń kásibı qatysýshylary baǵanyń naqty ósýindegi tómendeý traektorııasynyń áserinen 2024 jyldyń qorytyndysy boıynsha burynǵyǵa qaraǵanda tómenirek ınflıatsııany kútedi.
Syrtqy ınflıatsııalyq jaǵdaı qolaısyzdaý bolyp otyr. Álemdik naryqtarda azyq-túlik quny byltyr aıtarlyqtaı tómendegennen keıin sońǵy aılarda birtindep óse bastady. Atap aıtqanda, ósimdik maılary men sút ónimderiniń baǵasy joǵarylady.
Syrtqy aqsha-kredıt sharttary qatań qalpynda saqtalyp otyr. AQSh FRJ ınflıatsııanyń maqsatqa jaqyndaıtyndaı senimdi belgileri kóringenshe mólsherlemelerdi tómendetýdi josparlap otyrǵan joq. Al EOB bazalyq ınflıatsııa men ınflıatsııalyq kútýlerdiń tómendeýine baılanysty uzaq ýaqyt boıy ózgerissiz ustalǵan mólsherlemelerdi tómendetýge kiristi. Reseı Federatsııasynyń Ortalyq banki ınflıatsııanyń ósý úrdisi jalǵasqandyqtan qatań aqsha-kredıt sharttary uzaǵyraq ýaqyt saqtalatynyn kútip, mólsherleme kóteriledi dep boljaıdy.
Ekonomıkanyń qysqamerzimdi ekonomıkalyq ındıkatorǵa sáıkes ósýi 2024 jylǵy qańtar-mamyr aılarynda j/j 3,7% qalpynda baǵalanyp otyr. Іskerlik belsendilikke ishki jáne syrtqy suranys qoldaý kórsetip keledi. Іshki suranystyń turaqtylyǵyna fıskaldyq yntalandyrýdyń jalǵasýy, naqty jalaqynyń kóterilýi, sondaı-aq shıkizatqa qatysy joq sektordaǵy ınvestıtsııalardyń keńeıýi yqpal etip otyr. Ulttyq Bank baqylaıtyn iskerlik belsendilik ındıkatorlary birneshe aı qatarynan oń aımaqta qaldy.
Proınflıatsııalyq táýekelder saqtalyp otyr. Syrtqy orta jaǵynan olar Reseıdegi joǵary ınflıatsııaǵa jáne azyq-túliktiń álemdik baǵasynyń kóterilýine baılanysty, al ishki ortada bıýdjettik saıasat parametrleriniń belgisizdigine, retteletin baǵalar salasyndaǵy reformalardyń jalǵasýyna, ornyqpaǵan ınflıatsııalyq kútýler men ósip jatqan tutynýshylyq kredıtteý áser etetin turaqty ishki suranystyń saqtalýyna baılanysty.
Ulttyq bank kelip túsetin derekterdi, sonyń ishinde baǵa ósiminiń turaqty bóligin jáne jalpy ınflıatsııanyń targetke jaqyndaý traektorııasyn baqylaıdy. Aldaǵy tamyz aıynda bolatyn boljamdy raýnd aıasynda fıskaldyq saıasattyń parametrlerin qosa alǵandaǵy qalyptasatyn táýekelder balansy, sondaı-aq baǵamdyq faktordyń saldarynan aqsha-kredıt sharttarynyń jumsarý áseri baǵalanady.
Baǵa ósiminiń báseńdeý úrdisin bekitý úshin jáne ınflıatsııa boıynsha 5%-dyq maqsatqa qol jetkizý úshin aqsha-kredıt sharttary uzaq ýaqyt boıy ustamdy qatań qalpynda saqtalady.
Ulttyq banktiń bazalyq mólsherleme boıynsha kezekti josparly sheshimi 29 tamyzda jarııalanady.
