Ulttyq bank bazalyq mólsherlemeni jyldyń ekinshi jartysynda tómendetý múmkindigin qarastyrady
ASTANA. KAZINFORM – Qazirgi kezeńde bazalyq mólsherlemeni tómendetýge jetkilikti negiz qalyptasqan joq. Bul týraly Ulttyq bank tóraǵasy Tımýr Súleımenov aıtty.
- Syrtqy ortada qosymsha táýekelder bar. Geosaıası shıelenistiń kúsheıýi munaı baǵasynyń qubylýyna, saýda-seriktes elderdegi baǵa ahýalynyń ózgerýine, iri ortalyq bankter men ózge de ekonomıkalyq oıynshylardyń áreketterine áser etýi múmkin. Osyndaı jaǵdaıda ınflıatsııalyq kútýlerdi turaqtandyryp, ınflıatsııanyń turaqty tómendeýin qamtamasyz etý úshin aqsha-kredıt saıasatynyń birshama qatań sharttaryn saqtaý qajet, - dedi ol.
Ulttyq bank basshysynyń paıymynsha, qazirgi kezeńde bazalyq mólsherlemeni tómendetýge jetkilikti negiz áli qalyptasqan joq.
- Ekonomıka salyq ózgeristerine beıimdelý kezeńinen ótip jatyr. Bazalyq ınflıatsııanyń naqty dınamıkasy men ınflıatsııalyq kútýler de negizgi shekteýshi faktor bolyp otyr. Bazalyq boljam iske asyp, ınflıatsııa turaqty túrde baıaýlaǵan jaǵdaıda komıtet (Aqsha-kredıt saıasaty komıteti) bazalyq mólsherlemeni jyldyń ekinshi jartysynda tómendetý múmkindigin qarastyrady. Eger ınflıatsııalyq táýekelder ózgerse, aqsha-kredıt saıasatynyń qatańdyq deńgeıi men uzaqtyǵy da eki baǵytta ózgerýi múmkin, - dedi ol.
Esterińizge sala ketsek, Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18% deńgeıinde belgileý týraly sheshim qabyldady.
