Ulttyq bank bazalyq mólsherlemeni taǵy da 16,5 paıyz deńgeıinde qaldyrdy
ASTANA. KAZINFORM – Qazaqstan Respýblıkasy Ulttyq Bankiniń Aqsha-kredıt saıasaty komıteti bazalyq mólsherlemeni +/- 1 p.t. dálizimen jyldyq 16,5% deńgeıinde saqtaý týraly sheshim qabyldady. Bul sheshim boljamdy raýndtyń nátıjelerine negizdeldi. Onyń aıasynda negizgi makroekonomıkalyq kórsetkishterdiń boljamy jańartylyp, ınflıatsııa táýekelderiniń balansy qaıta baǵalandy.
Jyldyq ınflıatsııa shildede 11,8% deńgeıinde saqtaldy. Azyq-túlik jáne azyq-túlikke jatpaıtyn taýarlar baǵasy úzdiksiz ósti, al qyzmetter baǵasynyń ósýi jyl basynan beri alǵash ret baıaýlady. Sonyń nátıjesinde azyq-túlik taýarlarynyń jyldyq ınflıatsııaǵa qosqan úlesi buǵan deıin negizgi faktor bolǵan qyzmet kórsetý sektorynyń úlesinen asyp tústi. Aqyly qyzmetterdiń ınflıatsııasy retteletin baǵalardyń ósý qarqynynyń tómendeýi esebinen de baıaýlady.
– Aılyq ınflıatsııa 0,7%-ǵa deıin baıaýlaǵanymen, ortasha jyldyq mánderden edáýir joǵary qalyptasty (2015-2024 jj. – 0,4%). Sonymen qatar ınflıatsııanyń ornyqty bóligindegi kórsetkishter de birshama baıaýlady – bazalyq ınflıatsııa men maýsymdyq faktorlardan tazartylǵan ınflıatsııa 0,8% boldy (olar maýsymda 0,9% jáne 1% bolǵan). Baıaýlaǵanyna qaramastan, olardyń máni joǵary deńgeıde qalyptasyp otyr jáne olar tarıftik reformalardyń jalǵasýyna, fıskaldyq yntalandyrýǵa jáne jeke tulǵalardy kredıtteýdiń joǵary ósý qarqyny aıasyndaǵy ornyqty tutynýshylyq suranysqa baılanysty ınflıatsııalyq qysymnyń saqtalyp otyrǵanyn kórsetti, - dep habarlady Qazaqstan Ulttyq Bankiniń baspasóz qyzmeti.
Shildede halyqtyń ınflıatsııalyq kútýleri 14,2%-ǵa deıin ósti. Qysqamerzimdi kútýler – qubylmaly, al uzaqmerzimdi kútýler ósip keledi.
Qazaqstan Ulttyq Bankiniń málimetinshe, syrtqy sektordyń baǵalarǵa áseri saqtalyp otyr. Azyq-túliktiń álemdik baǵasy ósip keledi. Reseıde ınflıatsııa baıaýlaǵanyna qaramastan joǵary deńgeıde qalyp otyr. FRJ-nyń rıtorıkasy biraz jumsardy, alaıda syrtqy monetarlyq sharttar birshama nasharlady. Sebebi mamyrda ótken boljamdy raýndpen salystyrǵanda FRJ mólsherlemesiniń tómendeý qarqyny baıaýyraq bolady dep kútilýde. Buǵan FRJ targetinen joǵary bolyp otyrǵan ınflıatsııa, AQSh saýda saıasatymen baılanysty táýekelder, ınflıatsııadan artyq jalaqynyń ósýi yqpal etedi. Saýdadaǵy shıelenisterge baılanysty joǵary belgisizdikten EOB rıtorıkasy baıypty bola bastady.
Tirekti sheshimdi qabyldaý kezinde boljamdardy jańartý aıasynda bazalyq stsenarııde Brent markaly munaıdyń baǵasy boljamdy kezeńniń sońyna deıin ortasha eseppen 1 barrel úshin 60 AQSh dollary deńgeıinde qaldy.
– 2025 jylǵa ınflıatsııanyń boljamy naqtylandy. Ortamerzimdi kezeńde boljamdy baǵalaý ózgergen joq. 2025 jyly ınflıatsııa – 11-12,5%, 2026 jyly – 9,5-11,5%, 2027 jyly – 5,5-7,5% sheginde kútiledi. Boljam jekelegen azyq-túlik naryqtarynda baǵanyń kúrt ósýine, suranys jaǵynan ınflıatsııalyq qysymnyń kúsheıýine baılanysty naqtylandy. Ustamdy qatań aqsha-kredıt saıasaty jáne josparlanǵan fıskaldyq shoǵyrlandyrý sharalary ınflıatsııaǵa tejeýshi áser etetin bolady. Boljam táýekelderi fıskaldyq tártipti saqtaýǵa, ishki suranystyń kúsheıýine, syrtqy ınflıatsııanyń jedeldeýine, ınflıatsııalyq kútýlerdiń turaqtamaýyna, sondaı-aq retteletin baǵalar men QQS kóterilýiniń janama áserine baılanysty, - delingen habarlamada.
Qazaqstan ekonomıkasynyń 2025 jylǵa arnalǵan ósý boljamy 5,5-6,5%-ǵa deıin jaqsardy. Ekonomıkalyq ósimniń qazirgi qarqyny joǵary qalyptasýyna oraı, joǵary ınvestıtsııalyq belsendilikke jáne ornyqty tutynýshylyq suranysqa baılanysty boljam qaıta qaraldy. 2026 jylǵa boljam 4-5% deńgeıinde saqtaldy. Munaı sektoryndaǵy ósimniń jalǵasýy jáne ınvestıtsııalyq belsendilik 2026 jyly ekonomıkanyń ósýin qamtamasyz etedi. Jańa boljamdarǵa sáıkes 2027 jyldan bastap JІÓ ósýiniń qarqyny teńgerimdilik deńgeıge umtylady.
Otyrys aıasynda Aqsha-kredıt saıasaty komıteti ınflıatsııalyq qysymnyń tómendeýine septigin tıgizetin qosymsha sharalardy da talqylady. 2025 jylǵy qyrkúıekten bastap eń tómengi rezervtik talaptar boıynsha jańa sharttar qoldanysqa engiziledi, ol sharttar aqsha-kredıt saıasaty áserin kúsheıtip, qosymsha dezınflıatsııalyq yqpal etetin bolady. Sonymen qatar aqsha-kredıt saıasatyn iske asyrý tıimdiligin arttyrý boıynsha qosymsha sharalar qabyldanady. Jeke kredıt berý naryǵyn retteý úshin qoldanysqa engizilgen jáne qosymsha qabyldanatyn mıkro- jáne makroprýdentsııalyq sharalar áseri kúsheıedi dep kútilip otyr.
Aldaǵy aılarda ınflıatsııa qarqynynyń aıtarlyqtaı baıaýlamaýy qalyptasyp otyrǵan aqsha-kredıt sharttaryn qatańdatýǵa negiz bolady, ol sharttar ınflıatsııanyń 5%-dyq ortamerzimdi nysanaǵa qaraı ornyqty túrde tómendeý traektorııasyna oralýyna yqpal etedi. Osyǵan baılanysty Aqsha-kredıt saıasaty komıteti aldaǵy otyrystarda bazalyq mólsherlemeni kóterýdiń oryndylyǵyn qarastyratyn bolady.
Qabyldanǵan sheshim faktorlary men boljam týraly barynsha tolyq aqparat 2025 jylǵy 3 qyrkúıekte Ulttyq Banktiń resmı ınternet-resýrsynda[1] Aqsha-kredıt saıasaty týraly baıandamada usynylady. Qazaqstan Respýblıkasy Ulttyq Bankiniń Aqsha-kredıt saıasaty komıtetiniń bazalyq mólsherleme boıynsha kezekti josparly sheshimi 2025 jylǵy 10 qazanda Astana qalasynyń ýaqytymen saǵat 12:00-de jarııalanady.
Eske salsaq, osyǵan deıin Ulttyq bank ınflıatsııany turaqtandyrý úshin keshendi shara qabyldap jatqanyn jazǵan edik. Ol týraly tolyǵyraq tóraǵa Tımýr Súleımenov aıtyp berdi.