Ulttyq bank bazalyq mólsherlemeni ózgerissiz qaldyrdy

ASTANA. KAZINFORM – Qazaqstan Respýblıkasy Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p.t. dálizimen jyldyq 16,5% deńgeıinde belgileý týraly sheshim qabyldady. 

Ulttyq bank bul jolǵy sheshimniń sebebin birneshe faktormen baılanystyryp otyr.

— Jyldyq ınflıatsııa maýsymda 11,8% boldy. Barlyq komponent boıynsha baǵada ósim baıqalady. Tarıftik reformalardy iske asyrý aıasynda retteletin qyzmetterdiń, sol sııaqty naryqtyq qyzmetterdiń qymbattaýy esebinen qyzmet sektory (16,1%) burynǵysha baǵa ósimine sebep bolyp otyr. Sonymen qatar ımporttyq taýarlar men aýylsharýashylyq ónimderiniń negizgi túrleri qymbattaýyna baılanysty azyq-túlik ınflıatsııasy (10,6%) da aıtarlyqtaı úles qosty.
Inflıatsııanyń aılyq dınamıkasy 0,8%-ǵa deıin baıaýlady. Inflıatsııanyń ornyqty bóligindegi kórsetkishter birshama ósti: bazalyq ınflıatsııa — 0,9%, maýsymdyq faktorlardy eskermegendegi ınflıatsııa 1,0% boldy. Bul tarıftik reformalardyń jalǵasýy, fıskaldyq yntalandyrý jáne jeke kredıtteýdiń joǵary ósý qarqyny qoldap otyrǵan ornyqty tutynýshylyq suranys aıasynda ınflıatsııalyq qysym saqtalǵanyn kórsetedi, — dep jazylǵan rǵsmı málimette.

Buǵan deıin Eýrazııalyq turaqtandyrý jáne damý qory makroekonomıkalyq boljaý jáne zertteý bóliminiń bastyǵy Marına Grıchık bazalyq mólsherleme jyl aıaǵyna deıin 16,5% deńgeıinde saqtalatyny týraly boljam aıtqan bolatyn.