Ulttyq bank bazalyq mólsherlemeni kóterýi múmkin
ASTANA. KAZINFORM - Ulttyq bank aldaǵy ýaqytta bazalyq mólsherlemeni kóterýi múmkin. Bul týraly Ulttyq bank tóraǵasy Tımýr Súleımenov aıtty.
- Aqsha-kredıt saıasaty boıynsha budan keıingi sheshim naqty ınflıatsııanyń boljamdy traektorııaǵa sáıkestigine jáne táýekelder balansyndaǵy ózgeristerge baılanysty qabyldanatyn bolady. Aldaǵy aılarda ınflıatsııa qarqyny aıtarlyqtaı báseńdemegen jaǵdaıda komıtet ınflıatsııany 5 paıyzdyq maqsatqa qaraı baǵyttaý úshin qalyptasqan aqsha-kredıt sharttaryn qatańdatýdy josparlap otyr. Osyǵan baılanysty aldaǵy otyrystarda bazalyq mólsherlemeni kóterý múmkindigi joqqa shyǵarylmaıdy, - dedi ol.
Onyń aıtýynsha, Ultttyq bank negizgi saıasattan bólek, birqatar qosymsha sharany belsendi túrde iske asyrýdy jalǵastyryp keledi. Aqsha-kredıt saıasatynyń tıimdiligin arttyrý aıasynda jýyrda bankter úshin eń tómengi rezervtik talaptardy qatańdatý jónindegi bastamany aıaqtady. Tıisti qaýlyny basqarma qabyldady. Qujat osy jyldyń 2 qyrkúıeginen bastap kúshine enedi.
- Ol bizge artyq ótimdilikti tıimdirek shekteýge, aqsha massasynyń ósýin tejeýge jáne qosymsha dezınflıatsııalyq áser etýge múmkindik beredi. Aldaǵy ýaqytta aqsha naryǵyndaǵy operatsııalarǵa qatysty qosymsha praktıkalyq sharalar qabyldanatyn bolady. Olar aqsha-kredıt saıasatynyń sıgnaldaryn berý tetigin jaqsartýǵa baǵyttalmaq. Saıasatty aıqyndaýmen qatar, ony iske asyrý quraldary da barynsha tıimdi bolýy qajet. Osyǵan baılanysty jaqyn arada birqatar tehnıkalyq ári praktıkalyq qadamdar jasaımyz,- dedi Tımýr Súleımenov.
Aıta keteıik, Ulttyq banktiń altyn-valıýta qory rekordtyq deńgeıge jetti.