Ulttyq bank bazalyq mólsherlemeni keler jyly tómendetýi múmkin

ASTANA. KAZINFORM — Ulttyq bank tóraǵasy Tımýr Súleımenov Senat otyrysynda 2026 jyly bazalyq mólsherleme kezeń-kezeńmen tómendetilýi múmkin ekenin aıtty.

Senator Sergeı Karplıýk elde ınflıatsııa tym joǵary qarqynmen artyp jatqanyn aıtyp, Ulttyq bank pen Úkimet qabyldaǵan sharalar qashan nátıje beretinin surady. 

— Meniń kózqarasym boıynsha, bazalyq mólsherlemeni kóterý sharasy bul joly óz rólin aıtarlyqtaı jaqsy kórsetken sııaqty. Bazalyq mólsherleme tómen bolsa, aqsha-nesıe saıasaty jumsaq bolsa, ınflıatsııanyń deńgeıi qazirgiden áldeqaıda joǵary bolatyn edi. Biz ortasha qatań aqsha-nesıe saıasatyn ustap otyrmyz. Bul tutynýshylyq minez-qulyqty tejep, jınaqtaý ádetin yntalandyrady. Búkil ólshemderden osy tásil jumys istep turǵanyn kórip otyrmyz. Jınaqtaý ádeti degen — qoldaǵy aqshany qazir jaratýdan góri depozıt sııaqty uzaq merzimde jemis beretin dúnıege salý, — dedi ol.

Tımýr Súleımenov keler jyly ınflıatsııanyń qalaı qubylatyny qosylǵan qun salyǵynyń jańa mólsherlemesine de baılanysty bolatynyn aıtady.

— Keler jyly baǵanyń bári sharyqtaıdy dep boljaýdyń qajeti joq shyǵar. Biraq qandaı da bir áseri bolady. Odan keıin tarıfterdi bir deńgeıde qatyryp qoıý máselesine saýatty kelý kerektigi túsinikti. 1 sáýirge deıin moratorıı bar. Keıin bosata bastaımyz. Osy kezde qalaı bolatynyn, tarıfter qanshalyqty ósetinin Úkimet aıqyndaıdy. Bul da belgili bir jolmen ınflıatsııaǵa áser etedi. Sondyqtan ınflıatsııa boljamdary azaıǵanyna qaraı bazalyq mólsherlemeni, ekonomıkadaǵy aqshanyń qunyn birtindep túsire bastaýǵa daıyn bolamyz, — dedi Ulttyq bank basshysy.

Aıta keteıik, búgin Senattyń jalpy otyrysynda «2026 — 2028 jyldarǵa arnalǵan respýblıkalyq bıýdjet týraly» Zań talqylanyp, qujattyń jekelegen baptary Májiliske qaıtaryldy.