Ulttyq bank bazalyq mólsherlemeni birtindep tómendetýi múmkin
ASTANA. KAZINFORM – Inflıatsııanyń turaqty baıaýlaýy jáne jańa kúızelisterdiń bolmaýy jaǵdaıynda retteýshi bazalyq mólsherlemeni tómendetý máselesin qarastyrýy múmkin. Bul týraly Ulttyq bank tóraǵasy Tımýr Súleımenov aıtty.
Vedomstvo derekterine sáıkes, naýryz aıynda jyldyq ınflıatsııa 11% deńgeıinde qalyptasty.
– Qazirgi kezeńde bazalyq mólsherlemeni tómendetý úshin jetkilikti keńistik áli qalyptasqan joq. Negizgi shart — baǵa reformalarynyń qaıta jandaný aıasynda ınflıatsııanyń boljamdy traektorııa deńgeıinde nemese odan tómen turaqty baıaýlaýy. Osyndaı jaǵdaıda komıtet aldaǵy sheshimder sheńberinde mólsherlemeni tómendetý múmkindigin qarastyrady, - dedi ol Ulttyq banktegi brıfıngide.
Sonymen qatar Tımýr Súleımenov proınflıatsııalyq táýekelder saqtalyp otyrǵanyn atap ótti. Olardyń qatarynda ınflıatsııalyq kútýlerdiń joǵary bolýy, salyq reformasynyń yqtımal áseri, turǵyn úı-kommýnaldyq qyzmet tarıfteriniń jáne janar-jaǵarmaı baǵasynyń ósýi, sondaı-aq kvazımemlekettik sektor arqyly yntalandyrý parametrleri bar.
Qosymsha qysymdy syrtqy faktorlar da kúsheıtip otyr. Atap aıtqanda, geosaıası shıelenis, munaı baǵasynyń qubylmalylyǵy jáne syrtqy baǵa konıýnktýrasynyń ózgerýi áser etýde.
– Inflıatsııanyń ornyqty quramdas bólikteri men ınflıatsııalyq kútýler joǵary deńgeıde qalyp otyr. Táýekelder balansy áli de proınflıatsııalyq baǵytqa yǵysqan. Іshki jáne syrtqy faktorlardyń saqtalyp otyrǵan yqpaly sheshim qabyldaýda baıypty ári saqtyqpen qaraýdy talap etedi. Inflıatsııa turaqty túrde tómendep, jańa kúızelister bolmaǵan jaǵdaıda, aldaǵy otyrystarda bazalyq mólsherlemeni kezeń-kezeńimen tómendetý múmkindigin qarastyramyz, - dedi Ulttyq bank tóraǵasy.
Buǵan deıin Ulttyq bank bazalyq mólsherlemeni 18% deńgeıinde saqtaǵanyn jazǵanbyz.
