Ulttyq bank bazalyq mólsherlemeni 2026 jyldyń ortasyna deıin tómendetpeıdi

ASTANA. KAZINFORM — 2026 jyldyń jazyna deıin bazalyq mólsherlemeni tómendetýge negiz joq. Bul týraly Ulttyq banktiń tóraǵasy Tımýr Súleımenov málim etti.

- Buǵan deıin qabyldanǵan bazalyq mólsherlemeni kóterý týraly sheshim men Úkimettiń kommýnaldyq qyzmetter tarıfterin qaıta qaraý sharalary bazalyq mólsherlemeni qazirgi deńgeıde ustap turýǵa múmkindik berdi. Degenmen ınflıatsııa táýekelderi joǵary bolyp qala beredi. Inflıatsııanyń tómendeýine senimdilik tek uzaq merzimdi turaqty baıaýlaýy kezinde ǵana múmkin bolady, - dedi T.Súleımenov elordada ótken baspasóz máslıhatynda.

Onyń aıtýynsha, Ulttyq bank ınflıatsııanyń baıaýlaý qarqynyn, ishki suranysqa reaktsııany jáne baǵanyń ósýin tómendetý boıynsha Úkimetpen birlesken sharalardyń tıimdiligin baǵalaýdy jalǵastyrady.

- Degenmen Ulttyq bank qazirgi ýaqytta 2026 jyldyń birinshi jartyjyldyǵynyń sońyna deıin mólsherlemeni tómendetý múmkindigin kórip otyrǵan joq. Bul rette ınflıatsııanyń jaǵdaıy, bazalyq ınflıatsııa dınamıkasy jáne tarıftik ári salyq reformalarynyń keıinge qaldyrylǵan áseri eskerilip otyryp. Inflıatsııanyń baıaýlaýyna turaqty úrdistiń senimdi belgileri bolmaǵan jaǵdaıda, aqsha-kredıt sharttaryn qatańdatý múmkindigin joqqa shyǵarýǵa bolmaıdy, - dedi UB basshysy.

Buǵan deıin habarlanǵandaı, Ulttyq bank bazalyq mólsherlemeni 18 paıyz deńgeıinde saqtady.