Ulttyq bank bazalyq mólsherlemeni 18% deńgeıinde qaldyrdy
ASTANA. KAZINFORM — QR Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18% deńgeıinde belgileý týraly sheshim qabyldady.
Inflıatsııa 2025 jyldyń qorytyndysy boıynsha 12,3% bolyp, Ulttyq banktiń boljamyna sáıkes keldi. Inflıatsııanyń qalyptasýyna azyq-túlik komponenti (13,5%) kóp úles qosty. Onyń qurylymynda et pen maı baǵasynyń sharyqtaýy óndiris shyǵyndarynyń ósýine jáne joǵary eksporttyq jetkizilimderge negizdelgen. Azyq-túlikke jatpaıtyn ınflıatsııa sońǵy aılarda aıyrbastaý baǵamynyń nyǵaıýyna baılanysty birshama tómendedi (11,1%), al retteletin turǵyn úı-kommýnaldyq qyzmetter tarıfiniń ákimshilik sharalarǵa baılanysty tómendeýi saldarynan aqyly qyzmetter baǵasynyń ósý qarqyny baıaýlady (12,0% deıin).
2025 jylǵy jeltoqsanda aılyq ınflıatsııa birshama jedeldep, 0,9% boldy. Bazalyq ınflıatsııa 0,8% deńgeıinde — joǵary qalpynda qaldy.
Inflıatsııa burynǵysha usynys múmkindiginen asyp túsetin ornyqty ishki suranys jaǵdaıynda qalyptasyp otyr. Tarıftik reformanyń jáne JJM naryǵyn yryqtandyrýdyń qaıtalama áseri kútýler men baǵalarǵa áser etti.
Halyqtyń aldaǵy bir jylǵa ınflıatsııalyq kútýleri ósip (14,7%), qubylmaly kúıinde qaldy. Inflıatsııa boıynsha naryqtaǵy kásibı qatysýshylardyń 2026 jylǵa jasaǵan kútýleri de 10,8%-ǵa deıin birshama ósti.
Azyq-túliktiń álemdik baǵasy sońǵy aılarda tómendegenine qaramastan, áli de joǵary deńgeıde qalyp otyr. Dándi daqyldar men qant baǵasy ósý qalpynda. Reseı Federatsııasynda ınflıatsııa qatań aqsha-kredıt sharttaryna baılanysty báseńdep, EO-da turaqty túrde tómendedi. AQSh-ta FRJ saýda saıasatyna baılanysty ınflıatsııalyq táýekelderdiń óskenin atap ótip, mólsherlemeni birtindep tómendetýdi jalǵastyryp keledi. Geosaıası shıelenis kúsheıe tústi. Bul belgisizdikti kúsheıtip, meıilinshe joǵary ınflıatsııalyq jaǵdaıdy qalyptastyrýy múmkin.
2025 jyly Qazaqstan ekonomıkasynyń ósýi jyldyq mánde 6,5% boldy. Bul rette kólikte, qurylysta, saýdada, sondaı-aq taý-ken óndirisi men óńdeý ónerkásibinde joǵary qarqyn saqtalyp otyr.
Proınflıatsııalyq táýekelder, negizinen, usynystyń ósý qarqynynan asyp túsetin suranys, retteletin baǵalar men JJM-nyń ósýinen bolatyn uzaq qaıtalama áser sııaqty ishki faktorlarǵa negizdelgen. Jospardaǵy aýqymdy kvazıfıskaldyq yntalandyrý formaty men parametrleri qosymsha belgisizdikti qalyptastyrady. Ol respýblıkalyq bıýdjetti shoǵyrlandyrýda dezınflıatsııalyq áserdi álsiretýi múmkin. Táýekelder QQS mólsherlemesin kóterýdi jáne salyq tóleýshiler qataryn keńeıtýdi kózdeıtin salyq reformasyn júzege asyrýmen, sondaı-aq taıaýdaǵy toqsandar ishinde bıznesti keıin beıimdeýge de baılanysty.
Dezınflıatsııaǵa birqalypty qatań aqsha-kredıt sharttary, kepilsiz tutynýshylyq kredıtteýdiń baıaýlaýy (2025 jylǵy 11 aıda berýdiń ósýi — 7,3%), ETRT-ni arttyrý arqyly artyq ótimdilikti qysqartý, altyn satyp alýdy «aınalaý» operatsııalary men teńge baǵamynyń nyǵaıýy yqpal etedi.
Aqsha-kredıt saıasaty. Inflıatsııalyq úderisterdiń serpini jáne táýekelder teńgerimi Ulttyq Banktiń boljamy men baǵalaýyna saı qalyptasyp otyr. Bul rette syrtqy syn-qaterler, salyq júıesindegi ózgeristerdiń yqpaly qanshalyqty bolatynyna qatysty belgisizdik, sondaı-aq osy jylǵy ekinshi toqsannan bastap TKQ tarıfteri men JJM baǵasynyń qaıta ósý parametrleri bazalyq mólsherlemeni belgileýde baıypty ári saq ustanymdy qatej etedi. Osyǵan baılanysty bazalyq mólsherlemeniniń 2026 jylǵy birinshi jartyjyldyq sońyna deıin qazirgi deńgeıde saqtalý yqtımaldyǵy joǵary.
— Ulttyq bank baǵanyń ózgeris dınamıkasyn ári qaraı da turaqty baqylap, 2026-2028 jyldarǵa arnalǵan makroekonomıkalyq turaqtandyrý jáne ál-aýqatty arttyrý boıynsha birlesken is-qımyl baǵdarlamasy, sondaı-aq ınflıatsııany baqylaý jáne tómendetý boıynsha qabyldanǵan sharalardyń tıimdiligin baǵalaýdy jalǵastyrady. Qazaqstan Respýblıkasy Ulttyq bankiniń Aqsha-kredıt saıasaty komıtetiniń bazalyq mólsherleme boıynsha kezekti josparly sheshimi 2026 jylǵy 6 naýryzda Astana qalasynyń ýaqytymen saǵat 12:00–de jarııalanady, — delingen habarlamada.
Budan buryn QR Ulttyq banki tóraǵasynyń orynbasary Berik Sholpanqulov BJZQ-dan jınaqty almaý abzal ekenin aıtqan edi.