Ulttyq bank bazalyq mólsherlemeni 18 paıyz deńgeıinde saqtady
ASTANA. KAZINFORM — QR Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p.t. dálizimen jyldyq 18 % deńgeıinde saqtaý týraly sheshim qabyldady.
- Qazirgi sheshim boljamdy raýndtyń nátıjesine, negizgi makroekonomıkalyq kórsetkishterdiń jańartylǵan baǵalaryna jáne ınflıatsııalyq táýekelderdiń jalpy balansyna negizdelgen. Jyldyq ınflıatsııa qazanda 12,6% boldy (qyrkúıekte – 12,9%). Azyq-túlik taýarlary baǵasynyń ósýi 13,5%-ǵa (12,7%) jáne azyq-túlikke jatpaıtyn taýarlar baǵasynyń ósýi 11%-ǵa (10,8%) deıin qarqyn aldy. Qyzmetterdegi baǵanyń ósýi retteletin turǵyn úı-kommýnaldyq qyzmetterge baǵanyń ákimshilik tómendeýi saldarynan 12,9%-ǵa (15,3%) deıin baıaýlady. Joǵary ınflıatsııalyq dınamıka usynys múmkindiginen júıeli túrde asyp túsetin ornyqty suranys jaǵdaıynda qalyptasady, - delingen Ulttyq bank málimetinde.
Jekelegen taýar naryqtarynda saqtalyp otyrǵan teńgerimsizdik, ornyqty suranys, ımporttyń qymbattaýy jáne shyǵyndardyń ósýi aıasynda azyq-túlik komponenti burynǵysha ınflıatsııaǵa kóptep úles qosty. Servıstik ınflıatsııanyń úlesi azaıdy, alaıda baǵanyń ósý qarqyny baıaýlaǵanyna qaramastan, mańyzdy kúıinde qalyp otyr. Azyq-túlikke jatpaıtyn ınflıatsııada janarmaı men farmatsevtıkalyq ónim baǵasynyń ósýi jedeldegeni baıqalady.
Qazanda aılyq ınflıatsııa 0,5%-ǵa deıin aıtarlyqtaı baıaýlady, alaıda bazalyq ınflıatsııa 1% deńgeıinde – joǵary kúıinde qaldy. Bul bir jylǵa eseptegende 12,2% sáıkes keledi. Sonymen qatar, tutyný qorjynyndaǵy taýarlar men qyzmetterdiń shamamen 80%-y 5 paıyz targetten joǵary qarqynmen qymbattaıdy. Osynyń bári baǵa qysymynyń ornyqtylyǵy men keń qamtýyn kórsetedi. Bul proınflıatsııalyq dınamıka fıskaldyq jáne údemeli kvazıfıskaldyq yntalandyrýdyń, sondaı-aq artqan tutynýshylyq suranystyń áserinen kúsheıedi.
Munymen qosa, ınflıatsııanyń 2025 jáne 2026 jyldarǵa boljamy qaıta qaraldy. 2025 jyly ınflıatsııa 12-13%, 2026 jyly 9,5-12,5% sheginde eskerilgen. 2027 jyldyń qorytyndysy boıynsha ol 5,5-7,5%-ǵa deıin baıaýlaıtyny aıtylyp otyr.
Eske salsaq, bıyl 10 qazanda Qazaqstan Respýblıkasy Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18% deńgeıinde belgileý týraly sheshim qabyldady.