Ulttyq bank bazalyq mólsherlemeni 18%-ǵa deıin kóterdi

ASTANA. KAZINFORM — Qazaqstan Respýblıkasy Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18% deńgeıinde belgileý týraly sheshim qabyldady.

Aqsha-kredıt saıasaty komıteti taratqan aqparatqa sáıkes ınflıatsııanyń kúsheıýi, suranystyń usynystan asyp túsýi jáne belsendi fıskaldyq saıasat aıasynda aqsha-kredıt sharttarynyń jumsarýy baǵanyń shekten tys ósýine qaýip týǵyzdy. Osyǵan baılanysty ınflıatsııanyń dınamıkasyn turaqtandyryp, baǵanyń baqylaýdan shyǵýyna jol bermeý úshin sheshimdi qadam jasaýǵa týra keldi.

— Barlyq negizgi metrıka boıynsha ınflıatsııanyń óskeni baıqaldy. Jyldyq ınflıatsııa qyrkúıekte 12,9%-ǵa deıin qarqyn alyp (tamyzda — 12,2%), Ulttyq banktiń boljamynan asyp tústi. Azyq-túliktiń jekelegen sanattary qarqyndy túrde qymbattap keledi. Bul óndiris shyǵyndarymen jáne ımport qunynyń ósýimen baılanysty. Sonymen qatar servıstik ınflıatsııa da (15,3%) retteletin qyzmetterdiń (30,4%), sondaı-aq birqatar naryqtyq qyzmettiń qymbattaýy esebinen aıtarlyqtaı úles qosty. Janar-jaǵarmaı naryǵyn yryqtandyrý sharalaryn jalǵastyrý aıasynda azyq-túlikke jatpaıtyn ınflıatsııa qarqyn ala bastady (10,8%) — otyn baǵasy bir jylda 11,9%-ǵa qymbattap, qyrkúıekte 3,4%-ǵa ósti, — delingen habarlamada.

Aılyq ınflıatsııa 1,1%-ǵa deıin jedeldedi (tamyzda — 1,0%). Bazalyq jáne maýsymdyq faktorlar eskerilmegen ınflıatsııanyń kórsetkishteri de tıisinshe 1,2%-ǵa (buǵan deıin 1,1%) jáne 1,3%-ǵa (buǵan deıin 1,2%) deıin aıtarlyqtaı joǵarylady. Mundaı dınamıka ınflıatsııanyń turaqty sıpatyn jáne baǵa dınamıkasyndaǵy qaıtalama áserdiń birtindep biline bastaǵanyn kórsetedi.

Halyqtyń ınflıatsııalyq kútýleri 12 aı kezeńinde joǵary jáne qubylmaly bolyp, baǵalaýdaǵy belgisizdik saqtalyp qaldy. Naryqtaǵy kásibı qatysýshylardyń bıylǵy jylǵa arnalǵan ınflıatsııalyq kútýleri 11,3%-dan 12%-ǵa deıin ósti.

Komıtettiń málimetinshe, syrtqy ınflıatsııalyq áser áli saqtalyp otyr. Sonymen birge, eń aldymen, álemdik azyq-túlik naryqtary jaǵynan táýekel kúsheıe tústi. Sońǵy jyldary et pen ósimdik maıy sanattarynda baǵa jaǵynan rekordtyq ósim baıqaldy. Olardyń dınamıkasy belsendi ishki eksport jaǵdaıynda ishki baǵalardyń ósýine áser etedi.

Reseı Federatsııasyndaǵy ınflıatsııa salystyrmaly túrde joǵary bolyp qalǵanymen, onyń baıaýlaý belgileri baıqalady. EO-da ınflıatsııa — ornyqty. EOB baǵa dınamıkasy men ekonomıkalyq belsendiliktegi belgisizdikke baılanysty mólsherlemeni ózgertpeı, úzilis ustap tur. AQSh-ta FRJ birqalypty ınflıatsııalyq qysym men makroekonomıkalyq belgisizdik jaǵdaıynda jumyspen qamtýdy qoldaý úshin mólsherlemeni tómendetýge kóshti.

2025 jylǵy qańtar-tamyz aılaryndaǵy ekonomıkanyń ósýi jyldyq mánde 6,5%-ǵa deıin jedeldedi (2024 jylǵy uqsas kezeńde — 3,7%). Ósýdiń joǵary qarqyny kólik jáne qoımada saqtaý (+21,5%), qurylys (+18,1%) pen saýda (+8,9%) salasynda, sondaı-aq taý-ken (+9,6%) jáne óńdeý ónerkásibinde (+6,5%) saqtalýda.

Ósim bıýdjettik ekspansııaǵa jáne ishki tutynýǵa táýeldi sektorlarda shoǵyrlanyp tur. Suranystyń usynys múmkindikterinen asyp túsý belgileri kúsheıip, ımporttyń tıisinshe ósýine alyp kelip otyr. Qosymsha dınamıkany belsendi tutynýshylyq nesıeleý men joǵary ınflıatsııalyq kútýler berdi.

— Proınflıatsııalyq táýekelder negizinen ishki faktorlarmen qalyptasady jáne eń aldymen ornyqty túrdegi joǵary ishki suranyspen, tarıftik reformany iske asyrýǵa jáne janar-jaǵarmaı naryǵyn yryqtandyrýǵa baılanysty qaıtalama áserdiń bilinýimen, sondaı-aq QQS qosa alǵanda, salyq reformasynyń proınflıatsııalyq yqpal etýimen negizdeledi. Inflıatsııanyń aıtarlyqtaı jedeldeýi, joǵary ınflıatsııalyq kútýler men naqty tıimdi aıyrbastaý baǵamynyń álsireýi jıyntyq aqsha-kredıt sharttarynyń eleýli túrde jeńildeýine jáne boljamdy ınflıatsııanyń ornyqty tómendeý traektorııasynan aýytqýyna alyp keldi. Osy jaǵdaılarda, ınflıatsııanyń naqty deńgeıi boljamnan asyp túskenine baılanysty aqsha-kredıt saıasatyn qatańdatý maqsatynda Komıtet bazalyq mólsherlemeni arttyrý týraly sheshim qabyldady, — delingen vedomstvo habarlamasynda.

Altyn-valıýta operatsııalaryn teńdestirý, ETRT-ny ózgertý, mıkro jáne makroprýdentsııalyq shekteýlerdi engizý sharalarymen birge bul sheshim ınflıatsııalyq dınamıka men kútýlerdi turaqtandyrýǵa, teńgedegi aktıvterdiń qunyn ustap turýǵa jáne ınflıatsııa qarqynynyń artý táýekelderin boldyrmaýǵa baǵyttalǵan.

Ulttyq Bank proınflıatsııalyq jáne dezınflıatsııalyq faktorlardyń teńgerimin, ınflıatsııanyń baıaýlaý dınamıkasy men traektorııasyn muqııat baǵalaýdy jalǵastyrady. Qazirgi qatańdyq deńgeıi ınflıatsııany turaqtandyrý úshin jetkiliksiz bolǵan jaǵdaıda, qosymsha qatańdatý qajettiligi qarastyrylady.

Bazalyq mólsherleme boıynsha budan keıingi sheshimder naqty derekter jáne baǵa turaqtylyǵy úshin táýekelderdi baǵalaý eskerile otyryp qabyldanatyn bolady.

Qazaqstan Respýblıkasy Ulttyq bankiniń Aqsha-kredıt saıasaty komıtetiniń bazalyq mólsherleme boıynsha kezekti josparly sheshimi 2025 jylǵy 28 qarashada Astana qalasynyń ýaqytymen saǵat 12:00–de jarııalanady.

Budan buryn Ulttyq bank qazan aıynda bazalyq mólsherlemeni kóterý múmkindigi qarastyrylatynyn habarlaǵan edi.