Ulttyq bank bazalyq mólsherlemeni 18% deńgeıinde saqtady
ASTANA. KAZINFORM – QR Ulttyq bankiniń Aqsha-kredıt saıasaty komıteti bazalyq mólsherlemeni +/- 1 paıyzdyq tarmaq dálizimen jyldyq 18,0% deńgeıinde saqtaý týraly sheshim qabyldady.
Ulttyq bank málimetinshe, 2026 jylǵy naýryzda jyldyq ınflıatsııa 11%-ǵa deıin baıaýlaǵan (aqpanda – 11,7%). Onyń ishinde azyq-túlik ınflıatsııasy – 11,7% (12,7%), azyq-túlikke jatpaıtyn ınflıatsııa – 11,3% (11,6%), servıstik ınflıatsııa – 10,0% (10,8%).
– Inflıatsııanyń baıaýlaýyna birqalypty qatań aqsha-kredıt sharttary, aıyrbas baǵamynyń qolaıly serpini, tutynýshylyq suranystyń turaqtanýy jáne Úkimettiń ınflıatsııaǵa qarsy sharalary áser etti. Naýryzda aılyq ınflıatsııa 0,6%-ǵa deıin tómendedi. Degenmen onyń deńgeıi 5% nysanaly kórsetkishten joǵary bolyp qalyp otyr, bul ınflıatsııalyq qysymnyń saqtalǵanyn bildiredi, – delingen habarlamada.
Sonymen qatar halyqtyń ınflıatsııalyq kútýleri joǵary deńgeıde qalyp otyr: aldaǵy bir jylǵa arnalǵan boljam 14,6%-dy (13,7%) qurady. Naryq qatysýshylarynyń 2026 jylǵa arnalǵan kútýleri 10% deńgeıinde.
Syrtqy faktorlarǵa kelsek, Taıaý Shyǵystaǵy geosaıası ahýaldyń shıelenisýi energııa resýrstary, azyq-túlik pen tyńaıtqysh baǵasynyń ósýine ákelip, álemdik ınflıatsııalyq qysymdy kúsheıtti.
Reseıde ınflıatsııa áli de joǵary deńgeıde saqtalyp otyr.
Al Eýroaımaq pen AQSh-ta ınflıatsııanyń jedeldeýi belgisizdikti arttyryp, ortalyq bankterdiń paıyzdyq mólsherlemelerdi ózgerissiz qaldyrýyna sebep boldy.
Aldyn ala derekterge sáıkes, 2026 jyldyń qańtar-naýryz aılarynda Qazaqstan ekonomıkasy 3,0%-ǵa ósti. Munaı sektoryndaǵy baıaýlaýǵa qaramastan, qurylys, kólik, óńdeý ónerkásibi jáne saýda salalaryndaǵy joǵary belsendilik jalpy ósimdi qamtamasyz etti.
– Proınflıatsııalyq táýekelder negizinen syrtqy qysymnyń kúsheıýine baılanysty. Sonymen qatar tarıfterdiń ósýi, retteletin baǵalardyń artýy jáne fıskaldyq saıasattaǵy ózgerister ınflıatsııaǵa qosymsha áser etýi múmkin. Osyǵan baılanysty aqsha-kredıt sharttaryn jumsartý máselesi dezınflıatsııalyq úrdisterdiń turaqtylyǵy rastalǵannan keıin ǵana qaralady, – dep habarlady Ulttyq bank.
Retteýshi ınflıatsııa dınamıkasyn, ishki suranysty, bıýdjet shyǵyndaryn jáne syrtqy faktorlardy baqylaýdy jalǵastyratynyn atap ótti. Qazirgi úrdister saqtalǵan jaǵdaıda aldaǵy kezeńde bazalyq mólsherlemeni tómendetý múmkindigi qarastyrylýy múmkin.
QR Ulttyq bankiniń bazalyq mólsherleme boıynsha kelesi sheshimi 2026 jylǵy 5 maýsymda Astana ýaqytymen saǵat 12:00-de jarııalanady.
Aıta keteıik, naýryzdyń basynda Ulttyq bank bazalyq mólsherlemeni jyldyń ekinshi jartysynda tómendetý múmkindigin qarastyratyny habarlanǵan.
